২০ কোটি দর্শকে উপভোগ কৰিছে উদ্বোধনী মেচ

নিয়মীয়া বাৰ্তা ২৩ ছেপ্টেম্বৰঃ  দীর্ঘ অপেক্ষাৰ অন্তত যোৱা শনিবাৰে আবু ধাবিত আৰম্ভ হোৱা আই পি এলৰ উদ্বোধনী মেচ উপভোগ কৰিছে অভিলেখসংখ্যক ২০ কোটি দর্শকে৷ বিশ্বৰ যিকোনো ক্রীড়া প্রতিযোগিতাৰ উদ্বোধনী মেচ উপভোগ কৰা এয়া হ’ল সর্বাধিক পৰিমাণৰ দর্শক৷ এই কথা মঙলবাৰে ঘোষণা কৰে ভাৰতীয় ক্রিকেট নিয়ন্ত্রণ ব’ডৰ সচিব জয় শ্বাহে৷ ব্রডকাষ্ট অ’ডিয়েঞ্চ ৰিছার্চ কাউঞ্চিল (বার্ক)ৰ সমীক্ষাৰ উদ্ধৃতি দি জয় শ্বাহে টুইটাৰত কয় যে আই পি এলৰ উদ্বোধনী মেচে নতুন অভিলেখ স্থাপন কৰিছে৷ যোৱা শনিবাৰে মুম্বাই ইণ্ডিয়ানছ আৰু চেন্নাই ছুপাৰ কিংছৰ মাজত অনুষ্ঠিত ৰোমাঞ্চকৰ মেচখন টিভিৰ জৰিয়তে প্রায় ২০ কোটি লোকে উপভোগ কৰে৷ উল্লেখ্য যে এইবাৰৰ আই পি এল চলিত বর্ষৰ ২৯ মার্চৰ পৰা আৰম্ভ হোৱাৰ কথা আছিল যদিও মহামাৰী ক’ৰোনা ভাইৰাছৰ প্রাদুর্ভাৱৰ বাবে ১৯ ছেপ্ঢেম্বৰলৈ পিছুৱাই দিয়া হৈছিল৷