ভাৰতৰ ঐতিহাসিক বিশ্ব জয়ৰ ৩৭ বছৰ সম্পূর্ণ

নিয়মীয়া বাৰ্তা, ২৬ জুনঃ কপিল দেৱৰ নেতৃত্বত ভাৰতে ১৯৮৩ৰ ২৫ জুনত বিশ্বকাপত ঐতিহাসিক বিজয় সাব্যস্ত কৰাৰ মধুৰ ক্ষণে আজি ৩৭ বছৰ সম্পূর্ণ কৰিলে৷ ক্রিকেটৰ মোক্কা হিচাপে পৰিচিত লর্ডছত আজিৰ পৰা ৩৭ বছৰ পূর্বে ভাৰতে দুবাৰৰ চেম্পিয়ন ৱেষ্ট ইণ্ডিজক পৰাস্ত কৰি নতুন ইতিহাসৰ সূচনা কৰিছিল৷ ভাৰতীয় ক্রিকেটৰ ৰূপৰেখা সলনি কৰি দিয়া এই সোণালী মুহূর্তৰ স্মৃতি সোঁৱৰণ কৰি বিশ্বজয়ী দলটোৰ কেইবাগৰাকীও সদস্যই আজি আৱেগিক হৈ পৰে৷

ইয়াৰ ভিতৰত অন্যতম হ’ল কপিল দেৱ, মহিন্দৰ অমৰনাথ আৰু ছৈয়দ কিৰমানি৷ ‘সেই সময়ত আমি আটাইকেইগৰাকী খেলুৱৈ অত্যন্ত যুৱ আছিলোঁ৷ বিশ্বকাপ জয়ৰ কথা আমাৰ মনলৈ অহা নাছিল যদিও সুন্দৰ প্রদর্শনেৰে দেশবাসীৰ মন জয় কৰাৰ এক সপোন বুকুত বান্ধি আমি লর্ডছত ফাইনেল খেলিছিলোঁ৷ ঐক্যবদ্ধভাৱে আমি ৱেষ্ট ইণ্ডিজৰ বিৰুদ্ধে তীব্র যুঁজ দিছিলোঁ৷ পৰিস্থিতি অনুসৰি প্রতিগৰাকী খেলুৱৈয়ে প্রদর্শন দাঙি ধৰিছিল আৰু আমাৰ ঐক্য–সংহতিয়ে অৱশেষত শেষ হাঁহি মাৰিছিল৷’– ভাৰতৰ হৈ ৬৯খন টেষ্ট আৰু ৮৫খন এদিনীয়া খেলা মহিন্দৰ অমৰনাথে এইদৰে কয়৷

১৯৮৩ৰ বিশ্বজয়ৰ পিছতে ভাৰতত ক্রিকেটক লৈ এক ইতিবাচক পৰিৱেশ সৃষ্টি হয় আৰু ভাৰতীয় ক্রিকেটলৈ ই ব্যাপক পৰিৱর্তন কঢ়িয়াই আনে বুলিও প্রাক্তন ক্রিকেটাৰগৰাকীয়ে উল্লেখ কৰে৷ উল্লেখ্য যে ১৯৮৩ৰ বিশ্বকাপত ভাৰতে খিতাপ জয়ত মুখ্য ভূমিকা গ্রহণ কৰিছিল মহিন্দৰ অমৰনাথে৷

ইংলেণ্ডৰ বিৰুদ্ধে ছেমি ফাইনেলত তেওঁ দুটা উইকেট দখল কৰাৰ লগতে ৪৬ ৰানৰ দায়িত্বপূর্ণ ইনিংছ খেলিছিল৷ ফাইনেলতো তেওঁ ২৬ ৰান সংগ্রহ কৰাৰ লগতে মাত্র ১২ ৰান ব্যয় কৰি তিনিটা উইকেট দখল কৰিছিল৷ ইফালে, উক্ত দলটোৰ উইকেটৰক্ষক ছৈয়দ কিৰমানিয়ে ১৯৮৩ৰ বিশ্বজয়ৰ সোণালী ক্ষণৰ স্মৃতি সোঁৱৰণ কৰি কয় যে ৱেষ্ট ইণ্ডিজৰ বিৰুদ্ধে প্রতিযোগিতাৰ প্রথমখন মেচত জয় সাব্যস্ত কৰাটো ভাৰতৰ বাবে ‘গেম চেঞ্জাৰ’ আছিল৷ ‘কপিল দেৱে আমাক কৈছিল যে ৱেষ্ট ইণ্ডিজ দুবাৰৰ ডিফেণ্ডিং চেম্পিয়ন৷

তেওঁলোকৰ বিৰুদ্ধে আমাৰ হেৰুৱাবলগীয়া একো নাই৷ আমি সংঘবদ্ধ হৈ খেলিব লাগিব আৰু আত্মবিশ্বাসেৰে প্রত্যাহ্বানৰ সন্মুখীন হ’ব লাগিব৷’– কিৰমানিয়ে এইদৰে কয়৷ ইফালে, দলটোৰ অধিনায়ক কপিল দেৱে লর্ডছৰ স্মৃতি সোঁৱৰণ কৰি কয় যে ভাৰতৰ সেই ঐতিহাসিক জয়ৰ পিছৰে পৰা দেশত ক্রিকেটক জনসাধাৰণে গুৰুত্ব সহকাৰে গ্রহণ কৰিছে৷