🔹 ভংগ কৰিলে ৪৭ বছৰীয়া পুৰণি অভিলেখ
নিউজ ডেস্ক, ৫ জানুৱাৰী : অষ্ট্রেলিয়াৰ মাটিত চলিল যশপ্রীত বুমৰাহৰ বলিঙৰ তীক্ষ্ণধী চোক৷ ধাৰাবাহিকতা ৰক্ষাৰে প্রায় অকলেই অষ্ট্রেলিয়াক এই শৃংখলাত প্রত্যাহ্বান জনালে তাৰকা পেচাৰগৰাকীয়ে৷ কেংগাৰু বাহিনীৰ বেটিং বিভাগত ত্রাসৰ সৃষ্টি কৰি বুমৰাহে শৃংখলাত দখল কৰিছে সর্বাধিক উইকেট৷ এনে উজ্জীৱিত প্রদর্শনেৰে বুমৰাহে ইতিমধ্যেই শৃংখলাৰ মাজতে কেইবাটাও অনন্য কৃতিত্ব অর্জন কৰিছে৷ চলিত অষ্ট্রেলিয়া ভ্রমণতে বুমৰাহে টেষ্ট কেৰিয়াৰৰ ২০০ উইকেট সম্পূর্ণ কৰাৰ সমান্তৰালকৈ আন কেইটামান ঈর্ষণীয় অভিলেখো স্থাপন কৰিছে৷ ছিডনী টেষ্টতো অভিলেখৰ পৃষ্ঠাত নাম সংযোগ কৰে বুমৰাহে৷ অষ্ট্রেলিয়াৰ প্রথম ইনিংছত দুটা উইকেট দখলেৰে বুমৰাহে গঢ়িছে দুটা নতুন অভিলেখ৷ শুকুৰবাৰে প্রথম দিনৰ খেল সামৰণিৰ সময়ত অষ্ট্রেলিয়াৰ ইনিংছৰ প্রথমটো উইকেট দখল কৰা বুমৰাহে কালি পুৱা লাবুচানেৰ ৰূপত দ্বিতীয়টো উইকেট দখল কৰে৷ এইদৰে বুমৰাহ অষ্ট্রেলিয়াত অনুষ্ঠিত টেষ্ট শৃংখলাত সর্বাধিক উইকেট দখল কৰা ভাৰতীয় বলাৰ হিচাপে পৰিগণিত হৈছে৷ এইক্ষেত্রত তেওঁ দেশৰ প্রাক্তন স্পিনাৰ বিষেণ সিং বেদীৰ নামত থকা অভিলেখ ভংগ কৰিছে৷ এতিয়া অষ্ট্রেলিয়াৰ যিকোনো টেষ্ট শৃংখলাত সর্বাধিক উইকেট দখল কৰা বলাৰ হিচাপে পৰিগণিত হৈছে বুমৰাহ৷ চলিত ব’ৰ্ডাৰ–গাভাস্কাৰ ট্ৰফীত বুমৰাহে ৩২টা উইকেট দখল কৰিছে৷ বুমৰাহৰ পূর্বে অষ্ট্রেলিয়াত টেষ্ট শৃংখলাত সর্বাধিক উইকেট দখলৰ অভিলেখ আছিল বিষেণ সিং বেদীৰ নামত৷ ১৯৭৭–৭৮ চনৰ অষ্ট্রেলিয়া ভ্রমণত তেওঁ সমগ্র শৃংখলাত ৩১টা উইকেট দখল কৰিছিল৷ এই অভিলেখৰ সমান্তৰালকৈ বুমৰাহে আন এক গুৰুত্বপূর্ণ অভিলেখো স্থাপন কৰিছে৷ ভাৰত আৰু অষ্ট্রেলিয়াৰ মাজত অনুষ্ঠিত এই ব’ৰ্ডাৰ–গাভাস্কাৰ ট্ৰফী টেষ্ট শৃংখলাৰ এটা সংস্কৰণত সর্বাধিক উইকেট দখলৰ ক্ষেত্রত এতিয়া যুটীয়াভাৱে শীর্ষস্থান দখল কৰিছে বুমৰাহে৷ এইক্ষেত্রত এতিয়া প্রাক্তন ভাৰতীয় তাৰকা স্পিনাৰ হৰভজন সিঙৰ নামত থকা অভিলেখ স্পর্শ কৰিছে৷ হৰভজন সিঙে ২০০০–০১ ছিজনত অষ্ট্রেলিয়াৰ ভাৰত ভ্রমণৰ সময়ত ৩২টা উইকেট দখল কৰি এই অভিলেখ স্থাপন কৰিছিল৷ এতিয়া বুমৰাহে চলিত সংস্কৰণত ৩২টা উইকেট দখলেৰে এই অভিলেখ স্পর্শ কৰিছে৷