নিয়মীয়া বাৰ্তা, ১৮এপ্ৰিলঃ বিশ্ব ক্রিকেটৰ দুগৰাকী অন্যতম শ্রেষ্ঠ অধিনায়ক ক্রমে বিৰাট কোহলি আৰু ইয়ন মৰগান আজি আই পি এলত সমুখসমৰত নামিব৷ ইংলেণ্ডৰ বিশ্বকাপ বিজয়ী দলৰ অধিনায়ক মৰগান নেতৃত্বাধীন কলকাতা নাইট ৰাইডার্ছে মিডল অর্ডাৰৰ ব্যর্থতা দূৰ কৰাৰ লক্ষ্যৰে দেওবাৰৰ প্রথমখন মেচত ৰয়েল চেলেঞ্জার্ছ বাংগালুৰুৰ বিৰুদ্ধে খেলপথাৰত নামিব৷
একেদৰে কোহলি নেতৃত্বাধীন বাংগালুৰুৰ লক্ষ্য হ’ল চলিত আই পি এলত জয়ৰ হেটট্রিক সম্পূর্ণ কৰা৷ ক্রমাগত দুখন মেচত জয়েৰে আত্মবিশ্বাসী হৈ থকা কোহলি বাহিনীৰ বিৰুদ্ধে মৰগানৰ কলকাতা নাইট ৰাইডার্ছে আন এক অগ্ণিপৰীক্ষাৰ সন্মুখীন হ’ব লাগিব৷
বিশেষকৈ মুম্বাই ইণ্ডিয়ানছৰ বিৰুদ্ধে শেহতীয়া মেচখনত নিশ্চিত জয়ৰ দিশে অগ্রসৰ হোৱাৰ পিছতো শোচনীয় বেটিং ব্যর্থতাৰ বাবে পৰাজয়ৰ সন্মুখীন হোৱা কলকাতাই আৰ চি বিৰ শক্তিশালী বলিং আক্রমণৰ পৰা তীব্র প্রত্যাহ্বান লাভ কৰাটো নিশ্চিত৷ জয়ৰ বাবে দলটোৱে অধিনায়ক মৰগানৰ লগতে অলৰাউণ্ডাৰ আন্দ্রে ৰাছেল, সহঃ অধিনায়ক দীনেশ কার্তিক, অ’পেনাৰ নীতিশ ৰাণা আৰু শুভমন গীলৰ পৰা আক্রমণাত্মক বেটিং প্রদর্শন আশা কৰিব৷
খেলৰ সময়: বিয়লি ৩.৩০ বজা৷