নিয়মীয়া বাৰ্তা, ৫ অক্টোবৰঃ ইউনাইটেড আৰব এমিৰেটছত চলি থকা আই পি এলত প্রত্যাশিত প্রদর্শন দাঙি ধৰিব নোৱাৰিলেও অসম সন্তান ৰিয়ান পৰাগে বিশ্বৰ অন্যতম শ্রেষ্ঠ বেটছমেন বিৰাট কোহলিৰ পৰা এক বিশেষ উপহাৰ লাভ কৰিবলৈ সক্ষম হৈছে৷
শনিবাৰে ৰাজস্থান ৰয়েলছৰ বিৰুদ্ধে সহজ জয় সাব্যস্ত কৰাৰ পিছত ৰয়েল চেলেঞ্জার্ছ বাংগালুৰুৰ অধিনায়ক কোহলিয়ে প্রতিভাৱান বেটছমেন ৰিয়ানক নিজৰ স্বাক্ষৰসম্বলিত এখন বেট উপহাৰ হিচাপে আগবঢ়ায়৷ উদীয়মান খেলুৱৈক ৰাজস্থান ৰয়েলছে উদ্গনি যোগোৱা কার্যসূচীৰ অংশস্বৰূপে আৰ চি বিৰ তাৰকাগৰাকীয়ে ৰিয়ানক এই উপহাৰ প্রদান কৰে৷
ৰাজস্থান ৰয়েলছৰ আন এগৰাকী উদীয়মান তাৰকা ৰাহুল টেৱাটিয়াকো কোহলিয়ে বিশেষ উপহাৰেৰে উৎসাহিত কৰে৷ কিংছ একাদশ পঞ্জাবৰ বিৰুদ্ধে এটা অ’ভাৰত ৫টা ছিক্সাৰ কোবাই নিশাৰ ভিতৰতে নায়ক হৈ পৰা টেৱাটিয়াক কোহলিয়ে নিজৰ স্বাক্ষৰসম্বলিত এটা জার্ছী আগবঢ়ায়৷
মন কৰিবলগীয়া যে আই পি এলৰ আৰম্ভণিৰে পৰা ৰাজস্থান ৰয়েলছে যুৱ ক্রিকেটাৰসকলক প্রতিভা বিকাশৰ সুযোগ আগবঢ়াই আহিছে৷