মুম্বাইৰ বিপক্ষে জয় লক্ষ্ণৌৰ, মিচেল–মার্কৰামৰ অর্ধশতক, হার্দিকৰ ৫টা উইকেট
নিউজ ডেস্ক, ৫ এপ্ৰিলঃ পাঁচবাৰৰ চেম্পিয়ন মুম্বাই ইণ্ডিয়ানছে চলিত আইপিএলত তৃতীয়টো পৰাজয়ৰ সন্মুখীন হৈছে৷ মুম্বায়ে লক্ষ্ণৌ ছুপাৰ জায়েণ্টছৰ হাতত ১২ ৰানত পৰাস্ত হয়৷ মেচখনত ঘৰুৱা দলটোৱে জয়ৰ বাবে বান্ধি দিয়া ২০৪ ৰানৰ বৃহৎ লক্ষ্য অনুসৰণ কৰিবলৈ আহি সূর্য কুমাৰ যাদৱৰ সর্বাধিক ৬৭ ৰানৰ সহায়ত মুম্বায়ে নির্ধাৰিত ২০ অভাৰত ৫টা উইকেট হেৰুৱাই ১৯১ ৰানহে কৰিবলৈ সক্ষম হয়৷ সূর্য কুমাৰৰ উপৰি নমন ধিৰে ২৪টা বলত ৪৬, তিলক বার্মাই ২৫ আৰু অধিনায়ক হার্দিক পাণ্ডিয়াই ১৬টা বলত ২৮ ৰান কৰি অপৰাজিত হৈ থাকে৷ সূর্য কুমাৰৰ ৪৩টা বলৰ ইনিংছটোত আছিল ৯টা চাৰি আৰু ১টা ছয়৷ অ’পেনাৰদ্বয় উইল জেকছ (৫) আৰু ৰিয়ান ৰিকেলটন (১০) সম্পূর্ণৰূপে ব্যর্থ হয়৷ দলীয় স্ক’ৰ ১৭ ৰানতে দুয়োগৰাকী অ’পেনাৰক হেৰুৱাই বিপর্যয়ত পৰিছিল মুম্বাইবাহিনী৷ অৱশ্যে নমন আৰু সূর্য কুমাৰে তৃতীয় উইকেটত ৬৯ ৰান সংগ্রহ কৰি দলৰ বিপর্যয় কিছু ৰোধ কৰিছিল৷ নমন আউট হোৱাৰ পিছত সূর্য কুমাৰে তিলক বার্মাৰ সৈতে চতুর্থ উইকেটত ৬৬ ৰান সংগ্রহ কৰি দলৰ জয়ৰ পথ প্রশস্ত কৰিছিল যদিও সূর্য কুমাৰে আউট হোৱাৰ পিছত দলৰ জয়ৰ আশা নির্বাপিত হয়৷ লক্ষ্ণৌৰ হৈ ছার্দুল ঠাকুৰ, আকাশ দীপ, আভেছ খান আৰু ডিগভেছ ৰাথিয়ে এটাকৈ উইকেট লাভ কৰে৷ ইয়াৰ পূর্বে প্রথমে বেটিং কৰিবলৈ আহি অ’পেনাৰদ্বয় মিচেল মার্শ্ব আৰু এইডেন মার্কৰামৰ দর্শনীয় অর্ধশতকৰ সহায়ত লক্ষ্ণৌ ছুপাৰ জায়েণ্টেছে নির্ধাৰিত ২০ অভাৰত ৮টা উইকেট হেৰুৱাই ২০৩ ৰান সংগ্রহ কৰে৷ ইনিংছ মুকলি কৰিবলৈ আহি মিচেল আৰু মার্কৰামে প্রথম উইকেটৰ যুটিত ৬৭ ৰান কৰি লক্ষ্ণৌক সুন্দৰ আৰম্ভণি দিয়ে৷ মিচেলে ৩১টা বলত ৯টা চাৰি আৰু ২টা ছয়েৰে ৬০ ৰান কৰি বিদায় লয়৷ মিচেল আউট হোৱাৰ কিছু সময়ৰ পিছতে নিকোলাছ পুৰানে ১২ আৰু অধিনায়ক ঋষভ পণ্টে মাত্র ২ ৰান কৰি পেভিলিয়নমুখী হয়৷ সেই সময়ত দলটোৰ স্ক’ৰ আছিল ৩ উইকেটত ১০৭ ৰান৷ অৱশ্যে মার্কৰামে আয়ুস বাড’নিৰ সৈতে লগ লাগি চতুর্থ উইকেটত ৫১ ৰান সংগ্রহ কৰি দলক পুনৰ সবল স্থিতিত উপনীত কৰায়৷ বাড’নিয়ে ১৯টা বলত ৩০ ৰান কৰি বিদায় লয় যদিও মার্কৰামে ৩৮টা বলত ৫৩ ৰানৰ দর্শনীয় ইনিংছ খেলে৷ শেষৰ পিনে ডেভিদ মিলাৰে ১৪টা বলত ২৭ ৰান সংগ্রহ কৰি লক্ষ্ণৌক শক্তিশালী স্থিতিত উপনীত কৰায়৷ মুম্বাই ইণ্ডিয়ানছৰ হৈ অধিনায়ক হার্দিক পাণ্ডিয়াই সর্বাধিক ৫টা উইকেট লাভ কৰে৷ ট্রেণ্ট ব’ল্ট, অশ্বিনী কুমাৰ আৰু ভিগনেশ পুথুৰে এটাকৈ উইকেট লাভ কৰে৷ উল্লেখ্য যে লক্ষ্ণৌৱে এতিয়ালৈকে চাৰিখন মেচ খেলি দুখনত জয় আৰু দুখনত পৰাস্ত হয়৷