নিয়মীয়া বাৰ্তা, ২৮ এপ্রিলঃ বিলাসী বাহন আৰু নিত্য নতুন বাইকৰ প্রতি টীম ইণ্ডিয়াৰ প্রাক্তন অধিনায়ক মহেন্দ্র সিং ধোনীৰ দুর্বলতা সর্বজনবিদিত ৷ কেইবাখনো বিলাসী বাহন আৰু বাইকেৰে ভৰি আছে তেওঁৰ ফার্ম হাউছৰ বৃহৎ গেৰেজ ৷ তাৰ মাজৰে এখন বিলাসী বাইকত উঠি নিজৰ ফার্ম হাউছত কন্যা জিৱাৰ সৈতে সময় কটোৱা দেখা গ’ল ক্রিকেটৰ পথাৰৰ অন্যতম বিস্ফোৰক বেটছমেনগৰাকীক ৷ বিশ্বজুৰি মহামাৰীৰ ৰূপ ধাৰণ কৰা মাৰাত্মক ক’ৰোনা ভাইৰাছৰ প্রাদুর্ভাৱৰ বাবে প্রায় এমাহ ধৰি গৃহবন্দী হৈ থকা ধোনীয়ে কন্যা জিৱাক বাইকৰ পাছফালে উঠাই ফার্ম হাউছত ঘূৰি ফুৰাৰ এটা ভিডি’ পত্নী সাক্ষীয়ে ছ’চিয়েল মিডিয়াত শ্বেয়াৰ কৰিছে৷ সাক্ষীয়ে এই ভিডি’ শ্বেয়াৰ কৰাৰ ক্ষন্তেক সময়ৰ ভিতৰতে ছ’চিয়েল মিডিয়াত ধোনীৰ এই ব্যতিক্রমী ৰূপ ভাইৰেল হৈ পৰে ৷ মন কৰিবলগীয়া যে ২০১৯ৰ আই চি চি এদিনীয়া বিশ্বকাপৰ ছেমিফাইনেলত টীম ইণ্ডিয়া পৰাস্ত হোৱাৰ পিছৰে পৰা খেলপথাৰৰ পৰা আঁতৰি আছে মহেন্দ্র সিং ধোনী৷ যোৱা ২৯ মার্চৰ পৰা আৰম্ভ হ’বলগীয়া চলিত বর্ষৰ আই পি এলৰ জৰিয়তে তাৰকাগৰাকীয়ে প্রত্যাৱর্তনৰ লক্ষ্য লৈছিল যদিও ক’ৰোনা ভাইৰাছৰ প্রাদুর্ভাৱৰ বাবে আই পি এল স্থগিত হোৱাত ধোনীৰ কেৰিয়াৰ একপ্রকাৰ অনিশ্চয়তাৰ গৰাহত সোমাই পৰিছে৷ ধোনীৰ ভৱিষ্যতক লৈ ক্রিকেট মহলত ব্যাপক জল্পনা–কল্পনা অব্যাহত থকাৰ মাজতে আজি প্রাক্তন ক্রিকেটাৰ হৰভজন সিং আৰু আশিস নেহেৰাই আশংকা ব্যক্ত কৰে যে টীম ইণ্ডিয়াৰ তাৰকা উইকেটৰক্ষকগৰাকীৰ্ প্রত্যাৱর্তন হয়তো আৰু সম্ভৱ হৈ নুঠিব৷ কপিল দেৱ আৰু সুনীল গাভাস্কাৰৰ দৰে কিংবদন্তিয়েও এই আশংকা ব্যক্ত কৰিছিল ৷