নিয়মীয়া বাৰ্তা, ২১ ফেব্রুৱাৰীঃ জাপানৰ তাৰকা মহিলা খেলুৱৈ নাওমি অ’ছাকাই ক’ৰোনাৰ আতংকৰ মাজতেই মেলবর্নত অনুষ্ঠিত বছৰটোৰ প্রথমখন সন্মানীয় গ্রেণ্ডশ্লাম অষ্ট্রেলিয়ান অ’পেনৰ মহিলা শাখাৰ ছিংগলছৰ খিতাপ জয় কৰিবলৈ সক্ষম হৈছে৷
কালি অনুষ্ঠিত মহিলা শাখাৰ ছিংগলছৰ ফাইনেল মেচখনত তৃতীয় বাছনিপ্রাপ্ত অ’ছাকাই ২২তম বাছনিৰ আমেৰিকাৰ জেনিফাৰ ব্রেডীক পোনপটীয়া ছেটত পৰাস্ত কৰি খিতাপ হস্তগত কৰে৷ অ’ছাকাই মেচখনত আমেৰিকাৰ প্রতিদ্বন্দ্বীগৰাকীক ৬–৪, ৬–৩ ছেটত পৰাস্ত কৰে৷
উল্লেখ্য যে জাপানৰ তাৰকা টেনিছ খেলুৱৈগৰাকীৰ এয়া আছিল কেৰিয়াৰত দ্বিতীয়টো অষ্ট্রেলিয়ান অ’পেনৰ খিতাপ৷ ইয়াৰ পূর্বে অ’ছাকাই ২০১৯ চনত গ্রেণ্ডশ্লামখনৰ খিতাপ দখল কৰিছিল৷ ইপিনে, বর্ণিল কেৰিয়াৰত চতুর্থবাৰৰ বাবে গ্রেণ্ডশ্লামৰ খিতাপ জয় কৰিবলৈ সক্ষম হোৱা নাওমি অ’ছাকাই এতিয়ালৈকে ২১খন মেচত জয়ৰ ধাৰা অব্যাহত ৰাখিছে৷
আনহাতে অষ্ট্রেলিয়ান অ’পেনৰ দুটা বা ততোধিক খিতাপ দখল কৰা অ’ছাকা হ’ল অ’পেন এৰাৰ দ্বাদশগৰাকী মহিলা খেলুৱৈ৷ ইফালে প্রথমবাৰৰ বাবে গ্রেণ্ডশ্লামৰ ফাইনেলত প্রৱেশ কৰা আমেৰিকাৰ জেনিফাৰ ব্রেডীয়ে খিতাপ যুঁজৰ মেচখনত অ’ছাকাৰ বিৰুদ্ধে বিশেষ প্রতিদ্বন্দ্বিতা আগবঢ়াবলৈ সক্ষম নহ’ল৷
ইপিনে গ্রেণ্ডশ্লামখনৰ পুৰুষ শাখাৰ ছিংগলছৰ ফাইনেল মেচখন আজি অনুষ্ঠিত হ’ব৷ খিতাপ যুঁজৰ মেচখনত প্রতিদ্বন্দ্বিতা আগবঢ়াব ডিফেণ্ডিং চেম্পিয়ন তথা শীর্ষ বাছনিপ্রাপ্ত ছার্বিয়াৰ ন’ভাক জক’ভিচ আৰু চতুর্থ বাছনিৰ ৰাছিয়াৰ ডানিল মেডভেডেভে৷