নিয়মীয়া বাৰ্তা, ২৭ ফেব্ৰুৱাৰীঃ মহাৰাষ্ট্রত অব্যাহত থকা মহামাৰী ক’ভিডৰ সংক্রমণৰ প্রতি লক্ষ্য ৰাখি বি চি চি আয়ে ভাৰত আৰু ইংলেণ্ডৰ মাজত হ’বলগীয়া আগন্তুক এদিনীয়া শৃংখলা পুনেৰ পৰা স্থানান্তৰৰ চিন্তাচর্চা কৰিছে৷ তিনিখন মেচৰ এদিনীয়া শৃংখলাটো পুনেৰ এম চি এ ষ্টেডিয়ামত অহা ২৩ৰ পৰা ২৮ মার্চৰ ভিতৰত অনুষ্ঠিত হোৱাৰ কথা আছে৷ কিন্তু বৃহস্পতিবাৰে মহাৰাষ্ট্রত ক’ভিডত আক্রান্তৰ সংখ্যা ৮ হাজাৰ অতিক্রম কৰাত উদ্বিগ্ণ হৈ পৰিছে বি চি চি আই৷
উল্লেখ্য যে ভাৰত আৰু ইংলেণ্ডে অহা ৪ মার্চৰ পৰা আহমেদাবাদত চতুর্থ তথা অন্তিম টেষ্ট মেচ খেলাৰ পিছত একেটা স্থানতে পাঁচখন মেচৰ টি–২০ শৃংখলাত অংশ ল’ব৷ ইয়াৰ পিছতে দল দুটাই এদিনীয়া শৃংখলাৰ বাবে পুনেলৈ উৰা মৰাৰ কথা আছে৷ কিন্তু মুম্বাই আৰু পুনেকে ধৰি সমগ্র মহাৰাষ্ট্রত ক’ভিডৰ সংক্রমণ এইপর্যন্ত হ্রাস নোপোৱাত বি চি চি আয়ে এদিনীয়াৰ বাবে বিকল্প স্থানৰ সন্ধান কৰিছে৷ ব’র্ডে আনকি আই পি এলৰ মেচো মুম্বাই আৰু পুনেৰ বাহিৰত আয়োজনৰ চিন্তাচর্চা কৰিছে৷