নিয়মীয়া বাৰ্তা ডিজিটেল, ১৮ ডিচেম্বৰঃ ভাৰতৰ প্ৰবীণ স্পীনাৰ ৰবিচন্দ্ৰন অশ্বিনে আন্তঃৰাষ্ট্ৰীয় ক্ৰিকেটৰ পৰা অৱসৰ ঘোষণা কৰিছে। বৰষুণৰ বাবে ভাৰত বনাম অষ্ট্ৰেলিয়াৰ ব্রিজবেন টেষ্ট ড্ৰ’ৰে সামৰণি পৰে। খেলখন ড্ৰ’ হোৱাৰ পাছত সংবাদ মেলত অশ্বিনে কয় যে তেওঁ আন্তঃৰাষ্ট্ৰীয় ক্ৰিকেটৰ পৰা অৱসৰ লোৱাৰ সিদ্ধান্ত লৈছে। আন্তঃৰাষ্ট্ৰীয় কেৰিয়াৰত তেওঁ ৭০০ৰো অধিক উইকেট দখল কৰিছিল। ইতিমধ্যে অশ্বিনৰ অৱসৰ সন্দৰ্ভত জল্পনা-কল্পনা আৰম্ভ হৈছিল। গাব্বা টেষ্ট বাতিল হোৱাৰ পূৰ্বে বিৰাট কোহলিৰ সৈতেও বহু সময় কথা পাতি থকা দেখা গৈছিল। অৱসৰৰ কথা ঘোষণা কৰি অশ্বিনে কয়, “আন্তঃৰাষ্ট্ৰীয় ক্ৰিকেটৰ তিনিওটা ফৰ্মেটতে ভাৰতীয় ক্ৰিকেটাৰ হিচাপে এয়া মোৰ শেষ দিন। মই অনুভৱ কৰোঁ যে মোৰ মাজত এতিয়াও ক্ৰিকেটাৰৰ সাৰমৰ্ম বাকী আছে, কিন্তু মোৰ সেই দক্ষতা এতিয়া নাই। এতিয়া মোক ক্লাব পৰ্যায়ৰ ক্ৰিকেটত দেখা যাব। ভাৰতীয় ক্ৰিকেট দলৰ এইটো মোৰ শেষ দিন আৰু মই এই দীঘলীয়া যাত্ৰা উপভোগ কৰিলোঁ। ৰোহিত শৰ্মা আৰু আন সকলো সতীৰ্থৰ সৈতে ভাল স্মৃতি ভাগ কৰিলোঁ।” ২০১০ চনত জিম্বাবুৱেৰ বিৰুদ্ধে টি-২০ মেচ খেলি অশ্বিনে আন্তঃৰাষ্ট্ৰীয় পৰ্যায়ত অভিষেক ঘটায়। তেওঁ এজন মহান বলাৰ হিচাপে এটা লিগেচি প্ৰতিষ্ঠা কৰিছে। আন্তঃৰাষ্ট্ৰীয় কেৰিয়াৰত তেওঁ ভাৰতক প্ৰতিনিধিত্ব কৰি ২৮৭খন খেলত অংশগ্ৰহণ কৰিছিল। বলাৰ হিচাপে তেওঁ আন্তঃৰাষ্ট্ৰীয় ক্ৰিকেটত ৭৬৫টা উইকেট দখল কৰে। আন্তঃৰাষ্ট্ৰীয় ক্ৰিকেটত ভাৰতৰ হৈ অনিল কুম্বলেৰ পিছতে তেওঁ দ্বিতীয় সৰ্বাধিক উইকেট দখলকাৰী। তিনিওটা ফৰ্মেটতে কুম্বলে নিজৰ কেৰিয়াৰত ৯৫৬টা উইকেট দখল কৰে। অলৰাউণ্ডাৰ হিচাপেও অশ্বিনে নিজৰ নাম উজলাইছিল। টেষ্ট ক্ৰিকেটত ৬ শতক আৰু ১৪টা পঞ্চাশসহ ৩,৫০৩ ৰান সংগ্ৰহ কৰে। বিশেষকৈ তেওঁ টেষ্ট কিংবদন্তি হিচাপে স্বীকৃতি লাভ কৰিব। অশ্বিনৰ এই ঐতিহাসিক কেৰিয়াৰ ১৪ বছৰ ধৰি চলিছিল, য’ত তেওঁ ৭৬৫টা উইকেট লোৱাৰ উপৰি ৪৩৯৪ ৰান সংগ্ৰহ কৰিছিল। অষ্ট্ৰেলিয়াত অশ্বিনৰ কেৰিয়াৰৰ অন্তিমখন মেচত এডিলেইড পিংক বল টেষ্টত বলিঙত ২৯ ৰান সংগ্ৰহ কৰি এটা উইকেট দখল কৰে।