নিয়মীয়া বাৰ্তা ১৪ নৱেম্বৰঃ উৎকণ্ঠাৰ অৱসান ঘটাই আজি ডুবাইত অনুষ্ঠিত হ’ব টি–২০ বিশ্বকাপৰ বহু প্রত্যাশিত মহাৰণ৷ শক্তিশালী অষ্ট্রেলিয়া আৰু নিউজিলেণ্ডৰ মাজত অনুষ্ঠিত হ’বলগীয়া এই বিশ্বজয়ৰ মহাৰণক লৈ ক্রিকেট অনুৰাগীৰ মাজত ব্যাপক উৎকণ্ঠা বিৰাজ কৰা দেখা গৈছে৷ বিশেষকৈ দুয়োখন ছেমিফাইনেলৰে ৰোমাঞ্চকৰ সামৰণিৰ পিছত আজি ফাইনেল মেচখনো উত্তেজনাপূর্ণ আৰু শ্বাসৰুদ্ধকৰ হৈ উঠাৰ আশা কৰা হৈছে৷ উল্লেখ্য যে অষ্ট্রেলিয়াই এদিনীয়া বিশ্বকাপত অভিলেখসংখ্যক পাঁচবাৰ খিতাপ জয় কৰিছে যদিও টি–২০ বিশ্বকাপত এতিয়াও চেম্পিয়ন হ’ব পৰা নাই৷ একেদৰে কেন উইলিয়ামছনৰ নেতৃত্বত শেহতীয়াকৈ নিউজিলেণ্ডে আই চি চি ইভেণ্টত ধাৰাবাহিকভাৱে উন্নত প্রদর্শন দাঙি ধৰিছে যদিও টি–২০ বিশ্বকাপত দলটোৱে প্রথমবাৰৰ বাবে ফাইনেল খেলিব৷
২০১৯ৰ এদিনীয়া বিশ্বকাপৰ ফাইনেলত ইংলেণ্ডৰ হাতত নাটকীয়ভাৱে পৰাজয়ৰ সন্মুখীন হোৱা নিউজিলেণ্ডে শেহতীয়াকৈ আই চি চি টেষ্ট চেম্পিয়নশ্বিপৰ খিতাপ জয় কৰি ইতিহাস ৰচিছে৷ আই চি চি ইভেণ্টত দলটোৰ এই সফলতাৰ ধাৰা অব্যাহত ৰখাৰ লক্ষ্যৰে উইলিয়ামছন বাহিনী কাইলৈ খেলপথাৰত নামিব৷ ইয়াৰ পূর্বে ২০১৬ত ভাৰতত অনুষ্ঠিত টি–২০ বিশ্বকাপত নিউজিলেণ্ডে অষ্ট্রেলিয়াক পৰাস্ত কৰিছিল৷
অৱশ্যে বিশ্বকাপৰ ফাইনেলত দল দুটা ২০১৫ত অন্তিমবাৰৰ বাবে মুখামুখি হৈছিল৷ এদিনীয়া বিশ্বকাপৰ ফাইনেলত অষ্ট্রেলিয়াই নিউজিলেণ্ডক হৰুৱাই খিতাপত চুম্বন দিছিল৷ তেতিয়াৰে পৰা কেংগাৰু বাহিনীয়ে আই চি চি ইভেণ্টত কোনো খিতাপ জয় কৰিব পৰা নাই৷ অপ্রতিৰোধ্য পাকিস্তানক ছেমিফাইনেলত স্তব্ধ কৰি আত্মবিশ্বাস ওভতাই পোৱা অষ্ট্রেলিয়াই এইবাৰ টি–২০ বিশ্বকাপৰ দীঘলীয়া ব্যর্থতাৰ অৱসান ঘটোৱাৰ সুবর্ণ সুযোগ লাভ কৰিছে৷ অ’পেনাৰ ডেভিদ ৱার্নাৰ, অলৰাউণ্ডাৰ মার্কাছ ষ্টইনিছ আৰু উইকেটৰক্ষক মেথিউ ৱেডৰ সুন্দৰ ফর্মে দলটোৰ আত্মবিশ্বাস বৃদ্ধি কৰিছে৷ ট্রেণ্ট বল্ট, টিম ছাউডী আদিৰ দৰে দুর্ধর্ষ বেগী বলাৰক অষ্ট্রেলিয়াই কিদৰে প্রতিহত কৰে, সেয়া লক্ষণীয় হ’ব৷ ইফালে, নিউজিলেণ্ডে অ’পেনাৰ মার্টিন গুপ্ঢিল আৰু ডাৰিল মিচেলৰ পৰা সুন্দৰ আৰম্ভণি আশা কৰিব৷ অধিনায়ক কেন উইলিয়ামছনৰ পৰা দলে দীঘলীয়া ইনিংছ আশা কৰিছে৷ অলৰাউণ্ডাৰ জিমি নিচামে মিডল অর্ডাৰত চমকপ্রদ বেটিঙেৰে নিউজিলেণ্ডক ছেমিফাইনেলত ৰোমাঞ্চকৰ জয়ৰ সোৱাদ দিছিল৷ উল্লেখ্য যে দুয়োটা দলে গ্রুপ পর্যায়ত এখনকৈ মেচত পৰাজয়ৰ সন্মুখীন হৈছে৷