আহাৰৰ ক্ষেত্রত পালন কৰিবলগীয়া এটা গুৰুত্বপূর্ণ নিয়ম হ’ল একে সময়তে বেছি পৰিমাণৰ আহাৰ নাখাই কম পৰিমাণে দিনটোত কেইবাবাৰো আহাৰ খাব লাগে৷ অৱশ্যে দিনটোত তিনিবাৰ প্রধান আহাৰ খোৱা হয়৷ ৰাতিপুৱা, দুপৰীয়া আৰু ৰাতি৷ পুৱাৰ আহাৰ খাবা ৰজাৰ দৰে, দুপৰীয়া ৰাজকুমাৰৰ দৰে আৰু ৰাতিৰ আহাৰ খাবা ভিক্ষাৰীৰ দৰে৷
চিকিৎসা বিজ্ঞানীসকলৰ মতে মধ্যবিত্ত শ্রেণীৰ মানুহে অতিভোজন কৰে৷ স্বাস্থ্য ৰক্ষাৰ কাৰণে যিমান পৰিমাণৰ আহাৰৰ প্রয়োজন তাতকৈ বেছি আহাৰ তেওঁলোকে পেটলৈ পঠিয়ায়৷ এই বিষয়ে কোনো সন্দেহ নাই যে স্বাস্থ্য ৰক্ষাৰ প্রয়োজনতকৈ যিখিনি আহাৰ বেছিকৈ খোৱা হয়, সেইখিনি আহাৰে স্বাস্থ্যৰ যথেষ্ট ক্ষতিসাধন কৰে৷ স্বাস্থ্য ৰক্ষাৰ কাৰণে আহাৰ খোৱাৰ নিয়মটো হ’ল কেতিয়াও ভোক পলুৱাই খাব নালাগে৷ এনে কৰিলে বেমাৰৰ পৰা হাত সাৰি থাকিব পাৰি৷