নিয়মীয়া বাৰ্তা, ২৭ মাৰ্চঃ বিভিন্ন বিত্তীয় প্ৰতিষ্ঠানত নকল নথি পত্ৰ দেখুৱাই ঋণ আদায় কৰা এক প্ৰবঞ্চকৰ দলৰ দুজন সদস্য পৰিছে আৰক্ষীৰ জালত ৷ আৰক্ষীয়ে গ্ৰেপ্তাৰ কৰা প্ৰবঞ্চক দুজনৰ নাম হৈছে ডুমডুমীয়াৰ জেঙনিৰ আছিকুৰ ৰহমান আৰু ওপৰ ডুমডুমীয়াৰ ৰিবুল দাস ৷ আন এজন প্ৰবঞ্চক মিজানুৰ আলি পলাতক অৱস্থাত আছে ৷ মিজানুৰৰ ঘৰ ৰামপুৰ চলাপথাৰত ৷ জানিব পৰা মতে ৰিবুল আৰু আছিকুৰে শনিবাৰে এখন মটৰচাইকেল প্ৰৱঞ্চনাৰে ক্ৰয় কৰিবলৈ আহি ধৰা পৰে ৷ শেনচোৱাত দুই প্ৰৱঞ্চকক এটি বিত্তীয় প্ৰতিষ্ঠানৰ কৰ্মচাৰীয়ে প্ৰত্যক্ষ কৰি সন্ধ্যা ভাগত কৰায়ত্ত কৰে ৷ পিছত আৰক্ষীক চমজাই দিয়ে ৷ দলটোয়ে বিত্তীয় প্ৰতিষ্ঠান শ্ৰীৰাম ফাইনেঞ্চ, এল এন টি ফাইনেঞ্চ, এইছ ডি এফ চি আদিৰ পৰা ভুৱা নথি পত্ৰতে ঋণ আদায় কৰি বিভিন্ন গাড়ী ক্ৰয় কৰে ৷ ইয়াৰ ভিতৰত আছে জে চি বি , ট্ৰেক্টৰ , মটৰ চাইকেল আদি ৷ দলটোৱে গাড়ীসমূহ ক্ৰয় কৰি লগে লগে বিভিন্ন গ্ৰাহকক বিক্ৰী কৰি দিয়ে ৷ পিছত বিত্তীয় প্ৰতিষ্ঠানসমূহে ঋণ ঘূৰাই নাপায় এই প্ৰবঞ্চকৰ দলটোৰ কাষলৈ যায় যদিও দলটোৰ সদস্যই চোকা অস্ত্ৰ দেখুৱাই খেদি পঠিয়ায় ৷ অভিযোগ মতে প্ৰৱঞ্চকৰ দলটোক বিত্তীয় প্ৰতিষ্ঠানৰ একাংশ কৰ্মচাৰীয়ে ঋণ আদায় দিয়াৰ ক্ষেত্ৰত সহায় কৰে ৷ ইয়াৰ বিনিময়ত প্ৰৱঞ্চকৰ দলটোৰ পৰা এক লাভজনক ধন লাভ কৰে ৷ আৰক্ষীয়ে কেইবাকোটি টকা প্ৰৱঞ্চনাৰে বিত্তীয় প্ৰতিষ্ঠানৰ পৰা আদায় কৰি নিয়া দলটোৰ সদস্য প্ৰৱঞ্চক দুজনক জেৰা চলাই আছে ৷ এই দলটোৰ মূল মাষ্টাৰমাইণ্ড পলাতক মিজানুৰ আলী বুলি গ্ৰেপ্তাৰ হোৱা আছিকুল আৰু ৰিবুলে স্বীকাৰ কৰিছে ৷
প্ৰেৰক কনক হাজৰিকা