নিয়মীয়া বাৰ্তা, ৩ জানুৱাৰী: আজি বিয়লি সদ্য মাতৃহাৰা নাহৰকটীয়াৰ বিধায়ক তৰংগ গগৈৰ কাষত উপস্থিত হয় প্রাইড ইষ্ট এণ্টাৰটেইনমেণ্ট প্রাইভেট লিমিটেডৰ মুখ্য পৰিচালন সঞ্চালিকা ৰিণিকি ভূঞা শর্মা ৷ নিউজ লাইভ-নিয়মীয়া বাৰ্তাৰ দৰে জনপ্ৰিয় সংবাদ মাধ্যমক সন্মুখৰ কৰা নেতৃত্ব দিয়া দেশৰ ভিতৰতে মহিলা মেডিয়া বেৰণ হিচাপে জিলিকি উঠা অধ্যক্ষাগৰাকীয়ে যুৱ বিধায়কগৰাকীৰ শোক সন্তপ্ত পৰিয়ালবৰ্গৰ সৈতে আধা ঘণ্টাৰো ওপৰকাল কটায়।
উল্লেখ্য যে ৰাজনৈতিক ক্ষেত্ৰৰ উদীয়মান ব্যক্তিত্ব তৰংগ গগৈ ৰাজ্যৰ মুখ্যমন্ত্ৰীৰ অতি আস্থাভাজন হোৱাৰ সূত্ৰে মুখ্যমন্ত্ৰী পত্নী ৰিণিকি শৰ্মা ভূঞাৰো অতি প্ৰিয়পাত্ৰ ৷ প্রাইড ইষ্ট এণ্টাৰটেইনমেণ্ট প্রাইভেট লিমিটেডৰ মুখ্য পৰিচালন সঞ্চালিকাগৰাকীয়ে বিধায়ক মাতৃৰ প্ৰতিচ্ছবিতো মাল্যপৰ্ণ কৰে ৷
উল্লেখ্য যে মাতৃহাৰা তৰংগক সমবেদনা জনোৱাৰ উদ্দেশ্যে আজি তেওঁৰ আবাসত বিধায়ক প্ৰশান্ত ফুকন, বিনোদ হাজৰিকাৰ লগতে পৰ্যটন উন্নয়নৰ অধ্যক্ষ ঋতুপৰ্ণ বৰুবা আদিকে ধৰি কিইবাজন বিশিষ্ট লোক উপস্থিত হয়।
প্ৰেৰকঃ বুলন শইকীয়া, নাহৰকটীয়া