নিয়মীয়া বাৰ্তা, ২২ জানুৱাৰীঃ দ্বীপ ৰাষ্ট্র শ্রীলংকাৰ গৃহযুদ্ধত সন্ধানহীন ২০ সহস্রাধিক লোকক প্রথমবাৰৰ বাবে মৃত বুলি ঘোষণা কৰিছে দেশখনৰ ৰাষ্ট্রপতি গোটাবায়া ৰাজাপাকছাই ৷ ৰাজধানী কলম্বোত ৰাষ্ট্রসংঘৰ এগৰাকী কূটনীতিকৰ সৈতে হোৱা বৈঠকত ৰাষ্ট্রপতিগৰাকীয়ে উল্লেখ কৰিছে যে গৃহযুদ্ধৰ সময়ত সন্ধানহীন লোকসকলৰ মৃত্যু হৈছে ৷ আনকি ৰাষ্ট্রপতিৰ কার্যালয়ৰ পৰা সন্ধানহীন লোকসকলৰ আত্মীয়লৈ শীঘ্রে মৃত্যুৰ প্রমাণ–পত্র প্রেৰণ কৰা হ’ব বুলি স্পষ্ট কৰি দিয়া হৈছে ৷ স্মর্তব্য যে ৰাষ্ট্রপতিগৰাকীৰ এই ঘোষণাৰ সময়তে ৰাজধানী চহৰখনত হাজাৰ হাজাৰ লোকে সন্ধানহীন হৈ থকা নিকট আত্মীয়ৰ সবিশেষ তথ্য সদৰী কৰাৰ দাবী তুলি সংগঠিত কৰিছে প্রতিবাদী কার্যসূচী ৷ বহু পৰিয়ালে এতিয়াও আশা প্রকাশ কৰি আছে যে তেওঁলোকৰ সন্ধানহীন সদস্যবোৰ জীয়াই থাকিব পাৰে ৷ নিৰাপত্তা বাহিনীৰ হাতত এই লোকসকল বন্দী হৈ থকা বুলি অভিযোগ কৰা হৈছে ৷ কিন্তু শ্রীলংকা চৰকাৰে এই অভিযোগ বাৰে বাৰে অগ্রাহ্য কৰি আহিছে ৷