নিয়মীয়া বাৰ্তা, ১৯ মাৰ্চঃ নেতৃত্বৰ বোজা আঁতৰাৰ পিছত বিৰাট কোহলি প্রতিপক্ষৰ বাবে বিপজ্জনক হৈ পৰাৰ পূর্ণ সম্ভাৱনা আছে৷ আই পি এললৈ মাজত মাথোঁ এসপ্তাহ বাকী থকা অৱস্থাত এই মন্তব্য আগবঢ়াইছে কোহলিৰ আৰ চি বিৰ সতীর্থ গ্লেন মেক্সৱেলে৷
‘কোহলিয়ে দীর্ঘদিন ধৰি আৰ চি বিক সফলতাৰে নেতৃত্ব দিছে৷ এতিয়া তেওঁ নেতৃত্বৰ দায়িত্বৰ পৰা আঁতৰিছে আৰু সম্পূর্ণৰূপে বেটিঙত মনোনিৱেশ কৰিব পাৰিব৷ নেতৃত্বৰ বোজা দূৰ হোৱাৰ পিছত তেওঁ যিকোনো দলৰ বাবে বিপজ্জনক হৈ পৰাৰ সম্ভাৱনা আছে৷ তেওঁৰ সৈতে একেলগে খেলাৰ এক সুকীয়া মাদকতা আছে৷ আই পি এললৈ মই উৎকণ্ঠাৰে অপেক্ষা কৰিছোঁ৷’ –মেক্সৱেলে এইদৰে কয়৷
উল্লেখ্য যে বিবাহপাশত আবদ্ধ হ’বলৈ সাজু হোৱাৰ বাবে অষ্ট্রেলিয়ান অলৰাউণ্ডাৰগৰাকীয়ে আই পি এলৰ প্রথম সপ্তাহত আৰ চি বিৰ হৈ খেলপথাৰত নামিব নোৱাৰিব৷ প্রাক্তন অধিনায়ক কোহলি আৰু উদীয়মান বেগী বলাৰ মহম্মদ ছিৰাজৰ সৈতে মেক্সৱেলক আৰ চি বিয়ে মেগা নিলামৰ পূর্বে ৰিটেইন কৰিছিল৷ আগন্তুক আই পি এলত তেওঁ আৰ চি বিৰ সফলতাৰ অন্যতম অস্ত্র হ’ব৷