নিয়মীয়া বাৰ্তা, ২৫ জুলাইঃ পশ্চিমবংগৰ শিক্ষক নিযুক্তিৰ বিয়াগোম কেলেংকাৰিৰ অভিযোগত গ্রেপ্তাৰ হোৱা মন্ত্রী পার্থ চেটার্জীৰ ‘ঘনিষ্ঠ’ অর্পিতা মুখার্জীক ১ দিনৰ বাবে ই ডিৰ জিম্মাত দিছে বেংকশাল আদালতে৷ আজি অভিনেত্রী তথা মডেল অর্পিতাক পুনৰ ই ডিৰ বিশেষ আদালতত হাজিৰ কৰোৱা হ’ব৷ লক্ষণীয়ভাৱে কালি আদালতত ই ডিৰ তৰফৰ পৰা যুক্তি দর্শোৱাৰ সময়ত উল্লেখ কৰা হয় যে অর্পিতাৰ ফ্লেটত বাজেয়াপ্ত সম্পত্তি পিঁয়াজৰ বাকলিৰ দৰে যিমানেই তৰপ আঁতৰোৱা হয় সিমানেই ওলাই থাকে৷ আনফালে, ‘আলিবাবা’ৰ বাকচৰ সৈতেও অর্পিতাৰ ফ্লেটক তুলনা কৰিছে ই ডিয়ে৷
স্মর্তব্য যে শুকুৰবাৰে মন্ত্রী পার্থ চেটার্জীক জেৰা কৰাৰ মাজতে সন্ধিয়া তালিগঞ্জৰ বিলাসবহুল ফ্লেটৰ পৰা তালাচী চলাই কোটি কোটি টকা জব্দ কৰিছিল আৰক্ষীয়ে৷ সেই সময়ত ই ডিৰ বিষয়াসকলৰ চকু কপালত উঠে৷ কাৰণ ফ্লেটৰ ভিতৰত নগদ টকা, সোণৰ গহনা, বিদেশী মুদ্রা যিধৰণে উদ্ধাৰ হৈছে সেয়া ৰূপকথাৰ আলি বাবাৰ চন্দুকৰ দৰে ঘটনা৷ যিফালেই চোৱা যায়, কেৱল ধন৷ আনফালে পিঁয়াজৰ বাকলি গুচাই যেনেদৰে শেষ কৰিব নোৱাৰি, তেনেদৰে বিচাৰি থাকিলেও কিবা নহয় কিবা ফ্লেটত পোৱা যাব বুলি উল্লেখ কৰে ই ডিৰ বিষয়াই৷ ই ডিৰ সূত্রই সদৰী কৰা অনুসৰি অর্পিতাৰ গ্রেপ্তাৰ প্রসংগত পার্থ চেটার্জীক প্রশ্ন কৰাৰ সময়ত অর্পিতাক চিনি পায় বুলি তেওঁ স্বীকাৰ কৰিছে৷ অৱশ্যে টকাৰ উৎস সন্দর্ভত কোনোধৰণৰ কথা নাজানে বুলি পার্থ চেটার্জীয়ে ই ডিৰ বিষয়াৰ আগত মন্তব্য কৰিছে৷ অর্পিতা আৰু পার্থ চেটার্জীক মুখামুখি বহুৱাই জেৰা কৰিলে বহু তথ্য পোৱা যাব বুলি ই ডিৰ সূত্রই সদৰী কৰিছে৷
ইফালে, এই বিয়াগোম কেলেংকাৰিত মডেল তথা অভিনেত্রী অর্পিতাৰ বাসগৃহৰ পৰা ২২ কোটি টকা উদ্ধাৰ হোৱাৰ পাছত তৃণমূল কংগ্রেছে ঘোষণা কৰিছে যে দলৰ সৈতে অর্পিতাৰ কোনো সম্পর্ক নাই৷ কেইবাগৰাকীও তৃণমূল কংগ্রেছৰ নেতাই এই কথা ঘোষণা কৰি আছে৷ ইয়াৰ মাজতে অর্পিতা মুখার্জীয়েও উল্লেখ কৰিছে যে তেওঁ দলৰ সৈতে জড়িত নহয়৷ আজি জোকা ই এছ আই হাস্পতালৰ বাহিৰলৈ অহাৰ সময়ত ই ডিৰ হাতত ধৃত অর্পিতা মুখার্জীক সাংবাদিকসকলে তেওঁৰ ৰাজনৈতিক পৰিচয় সন্দর্ভত প্রশ্ন কৰাত অভিনেত্রীগৰাকীয়ে কয় যে তেওঁ দলৰ সৈতে জড়িত নহয়৷
স্মর্তব্য যে শিক্ষক নিযুক্তি কেলেংকাৰিৰ গোচৰত প্রায় ২৭ ঘণ্টা ধৰি জেৰা কৰাৰ পাছত ই ডিয়ে গ্রেপ্তাৰ কৰিছে ৰাজ্যখনৰ মন্ত্রী পার্থ চেটার্জী৷ পার্থ চেটার্জীৰ পৰা লাভ কৰা তথ্যৰ ভিত্তিতেই তালিগঞ্জৰ বিলাসবহুল ফ্লেটত তালাচী চলাইছিল ই ডিয়ে৷ ইয়াৰ পাছতে তৃণমূলৰ কুনাল ঘোষ, ফিৰহাদ হাকিম আদি একাংশ নেতাই সংবাদ মেলত উল্লেখ কৰে যে অর্পিতাৰ বাসগৃহৰ পৰা এই ধন জব্দ হৈছে৷ কিন্তু অর্পিতা তৃণমূল কংগ্রেছৰ সৈতে কোনো প্রকাৰে জড়িত নহয়৷ ইফালে, এই সমস্ত ঘটনা সন্দর্ভত ৰাজ্যখনৰ মুখ্যমন্ত্রী মমতা বেনার্জীয়ে মৌনতা অৱলম্বন কৰা বিষয়টোক লৈ আজি বিজেপিয়ে ক্ষুৰাধাৰ সমালোচনা কৰিছে নেত্রীগৰাকীক৷ লক্ষণীয় বিষয়টো হৈছে সেই কেলেংকাৰিৰ গোচৰত গ্রেপ্তাৰ হোৱা অর্পিতা মুখার্জীৰ আইনৰ ওপৰত আস্থা থকা বুলি সংবাদ মাধ্যমৰ আগত উল্লেখ কৰাৰ উপৰি তেওঁৰ বিৰুদ্ধে গভীৰ ষড়যন্ত্র চলা বুলিও মন্তব্য কৰিছে৷ ইফালে ই ডিৰ হাতত গ্রেপ্তাৰ হোৱা মন্ত্রী পার্থ চেটার্জীক অসুস্থতাৰ বাবে কলকাতাৰ এছ এছ কে এম হাস্পতালত ভর্তি কৰাৰ নির্দেশ দিছে নিম্ন আদালতে৷ অৱশ্যে এইক্ষেত্রত তীব্র অসন্তুষ্টি প্রকাশ কৰিছে ই ডিয়ে৷ গতিকে কলকাতা উচ্চ ন্যায়ালয়ে পার্থ চেটার্জীক এছ এছ কে এম হাস্পতালত ৰখা হ’ব নে এইমছত অভিযুক্ত মন্ত্রীগৰাকীক ভর্তি কৰা হ’ব সেই সন্দর্ভত ৰায়দান কৰিব৷