নিয়মীয়া বাৰ্তা, ১০ আগষ্টঃ আমেৰিকা যুক্তৰাষ্ট্রৰ প্রাক্তন ৰাষ্ট্রপতি ড’নাল্ড ট্রাম্পৰ ফ্ল’ৰিডাস্থিত ব্যক্তিগত বাসভৱনত আজি ফেডাৰেল ব্যুৰ’ অৱ ইনভেষ্টিগেচন (এফবিআই)এ কোনো জাননী নিদিয়াকৈ তালাচী চলায়৷ আমেৰিকাৰ ৰাষ্ট্রপতি হিচাপে পুনৰবাৰ নির্বাচিত হোৱাত ব্যর্থ হোৱা ড’নাল্ড ট্রাম্পে ৬ জানুৱাৰীৰ কেপিটল সংঘর্ষ আৰু ২০২০ চনৰ নির্বাচনত অনিয়মৰ আশ্রয় লোৱাৰ বাবে এফ বি আয়ে প্রাক্তন ৰাষ্ট্রপতিগৰাকীৰ বিৰুদ্ধে ব্যৱস্থা গ্রহণ কৰি আছে৷ দেশৰ ইতিহাসত প্রাক্তন ৰাষ্ট্রপতিৰ বাসগৃহত কোনো ধৰণৰ জাননী নিদিয়াকৈ এফ বি আয়ে তালাচী চলোৱাটো আমেৰিকা যুক্তৰাষ্ট্রৰ কাৰণে ক’লা অধ্যায় বুলি আখ্যা দিছে ড’নাল্ড ট্রাম্পে৷
উল্লেখ্য যে ২০২০ ৰাষ্ট্রপতি নির্বাচনৰ সময়ত ড’নাল্ড ট্রাম্পে বিভিন্ন অন্যায় আৰু অনীতিৰ আশ্রয় লোৱাৰ অভিযোগক লৈ দেশখনৰ ন্যায় বিভাগে এতিয়াও তদন্ত চলাই আহিছে৷ নির্বাচনৰ সময়ত ৬ জানুৱাৰীত কেপিটলত সংঘর্ষৰ আঁৰত ৰাষ্ট্রপতি ট্রাম্প জড়িত থকাৰ অভিযোগ উত্থাপিত হোৱাৰ বাবেই দেশখনৰ ন্যায় বিভাগে প্রাক্তন ৰাষ্ট্রপতিগৰাকীৰ বিৰুদ্ধে অভিযান চলাই আছে৷