নিয়মীয়া বাৰ্তা, ২২ আগষ্টঃ ছেপ্টেম্বৰত নিউজিলেণ্ড ‘এ’ দলৰ বিৰুদ্ধে ঘৰুৱা খেলপথাৰত দুটা সংস্কৰণৰ শৃংখলাত ভাগ ল’ব ভাৰত ‘এ’ দলে৷ এই দুয়োটা সংস্কৰণতে ভাৰতক নেতৃত্ব দিব শুভমন গিলে৷ এই শৃংখলাত তিনিখন চাৰিদিনীয়া আৰু তিনিখন এদিনীয়া মেচ অনুষ্ঠিত হ’ব৷ ভাৰতৰ ৰাষ্ট্রীয় দলত নিয়মিতভাৱে খেলা কেইবাজনো ক্রিকেটাৰে ভাৰত ‘এ’ দলৰ হৈ খেলিব৷ বিচিচিআয়ে আনুষ্ঠানিকভাৱে এতিয়াও দল ঘোষণা কৰা নাই যদিও ভাৰতক নেতৃত্ব দিব শুভমনে৷ প্রথমবাৰৰ বাবে ৰাষ্ট্রীয় দলৰ জার্র্ছী পৰিধান কৰি নেতৃত্ব প্রদান কৰা দেখা যাব তেওঁক৷ সম্প্রতি জিম্বাব’ৱেৰ বিৰুদ্ধে এদিনীয়া শৃংখলাত ব্যস্ত হৈ আছে গিল৷ দেশলৈ উভতি আহিয়েই ভাৰত ‘এ’ দলৰ শিবিৰত তেওঁ যোগ দিব৷