চৰকাৰী বঞ্চনাৰ বলি গাঁও প্ৰধানসকল, আন্দোলনৰ কাৰ্যসূচী লোৱাৰ হুংকাৰ: যোৰহাট অধিৱেশনত ৰাজ্যিক সভাপতি গোবিন গগৈ

নিয়মীয়া বাৰ্তা, ১১ ফেব্ৰুৱাৰী: প্ৰশাসন আৰু জনসাধাৰণৰ সমন্বয়ৰ সাকোঁ স্বৰূপ গাঁও প্ৰধানসকলক চৰকাৰে দীৰ্ঘদিনে কৰি অহা বঞ্চনাৰ প্ৰতিবাদত অচিৰেই আন্দোলনৰ কাৰ্যসূচী হাতত লোৱা হ’ব। ইতিমধ্যে চৰকাৰৰ ওচৰত বিভিন্ন দাবী সম্বলিত স্মাৰক পত্ৰ প্ৰদান কৰা হৈছে যদিও কোনো সহাঁৰি নোপোৱাত হতাশাত ভুগিছে ৰাজ্যখনৰ ছয় সহস্ৰাধিক গাঁও প্ৰধান। সেয়েহে গণতান্ত্ৰিক পদ্ধতিৰ প্ৰতিবাদ কৰাৰ বাদে আন কোনো বিকল্প নাই।”কালি মহাপুৰুষ শংকৰদেৱ কলা-কৃষ্টি গৱেষণা কেন্দ্ৰত অনুষ্ঠিত সদৌ অসম গাঁও প্ৰধান সংস্থা,যোৰহাট জিলা সমিতিৰ দ্বি-বাৰ্ষিক অধিৱেশনত সন্মানিত অতিথি ৰূপে অংশগ্ৰহণ কৰি গাঁও প্ৰধান সংস্থাৰ ৰাজ্যিক সভাপতি গোবিন গগৈয়ে নিজ বক্তব্যত এইদৰে কয়।

পুৱা উদযাপন সমিতিৰ সভাপতি অচিন্ত দত্তই পতাকা উত্তোলন কৰি কাৰ্যসূচীৰ শুভাৰম্ভ কৰাৰ পাছতে গোবিন বৰাই বন্তি প্ৰজ্বলন, মহেন্দ্ৰ শইকীয়াই স্মৃতি তৰ্পণ কৰে। ইয়াৰ পাছতে বিপুল শইকীয়াৰ পৌৰোহিত্যত মুকলি সভা অনুষ্ঠিত হয়। কণমানি চিন্ময়ী কলিতাই এটি বৰগীতেৰে শুভাৰম্ভ কৰা সভাখন উদ্বোধন কৰে অৱসৰপ্ৰাপ্ত উপ -আৰক্ষী অধীক্ষক গুণকান্ত বুঢ়াগোহাঁয়ে। বিশিষ্ট অতিথি ৰূপে উপস্থিত থাকি জিলা উপায়ুক্ত পুলক মহন্ত,অতিৰিক্ত উপায়ুক্ত কবিতা কাকতি কোঁৱৰ,চক্ৰ বিষয়া দেৱাহুতি ডেকা, যোৰহাট প্ৰেছ ক্লাবৰ সভাপতি দিগন্ত বুঢ়াগোহাঁয়ে গাঁও প্ৰধান সকলে তৃণমূল পৰ্যায়ত আগবঢ়োৱা সেৱাৰ শলাগ লোৱাৰ লগতে ভৱিষ্যতে তেওঁলোকে নিজ নিজ ক্ষেত্ৰত সহযোগিতা আগবঢ়োৱাৰ প্ৰতিশ্ৰুতি দিয়ে।কেন্দ্ৰীয় সমিতিৰ কাৰ্যকৰী সভাপতি সমৰেন্দু হাজৰিকা,উপ সভাপতি শোণিত গগৈ,সহকাৰী সম্পাদক দিগন্ত বৰুৱা,সাংগঠনিক সম্পাদক জ্ঞান ৰঞ্জন বেজবৰুৱা,মনোজ শইকীয়াই গাঁও প্ৰধান সকলৰ সমস্যা সমাধানৰ বাবে চৰকাৰেৰে যোগাযোগৰ বিষয়টো উপস্থাপন কৰাৰ লগতে ভৱিষ্যৎ পৰিকল্পনা সম্পৰ্কে বাখ্যা কৰে।নিৰ্দিষ্ট বক্তা ৰূপে অংশ গ্ৰহণ কৰি কাকজান মহাবিদ্যালয়ৰ অধ্যাপক তুফেল জিলানীয়ে বৃটিছ শাসনৰ সময়ৰে পৰা চলি অহা গাঁওবুঢ়া(বৰ্তমান গাঁও প্ৰধান)সকলৰ অগ্ৰণী ভূমিকা সম্পৰ্কে বহুল ব্যাখ্যা আগবঢ়ায়।শলাগ জ্ঞাপন কৰে উদযাপন সমিতিৰ সম্পাদক অনন্ত কুমাৰ গগৈয়ে।

উল্লেখ্য যে ৯ ফেব্ৰুৱাৰীত যোৰহাট পূৱ আৰু পশ্চিম ৰাজহ চক্ৰৰ সভাকক্ষত অনুষ্ঠিত প্ৰতিনিধি সভাত যোৰহাট পূৱ ৰাজহ চক্ৰৰ মহেন্দ্ৰ শইকীয়াক সভাপতি আৰু টীয়ক ৰাজহ চক্ৰৰ দিলীপ দত্তক সম্পাদক ৰূপে লৈ সদৌ অসম গাঁও প্ৰধান সংস্থাৰ যোৰহাট জিলা সমিতিখন গঠন কৰা হয়।

নবজ্যোতি তামুলী,চিনামৰা