নিয়মীয়া বাৰ্তা ১৩ ফেব্ৰুৱাৰীঃ ভঙাগড়ৰ এটা কুৰিয়াৰ ছার্ভিচ কার্যালয়ৰ তলা ভাঙি ৫.৬৬ লাখ টকা হৰলুকী কৰাৰ অভিযোগত বুধবাৰে প্রতিষ্ঠানটোৰ শাখা পৰিচালকসহ এজন কর্মচাৰীক আৰক্ষীয়ে গ্রেপ্তাৰ কৰে৷ ধৃত লম্পট দুজন ক্রমে নুনমাটিৰ মুনীন্দ্র দাস (৩৭) আৰু অনুপ বর্মন (২৩)৷ আৰক্ষী সূত্রে জানিব পৰা মতে, ধৃত মুনীন্দ্র দাস আৰু অনুপ বর্মন ‘এক্সপ্রেছ–বি’ কুৰিয়াৰ ছার্ভিচৰ ভঙাগড় শাখাৰ পৰিচালক আৰু বিষয়া হিচাপে কর্মৰত আছিল৷ মঙলবাৰে নিশা দুয়োজনে প্রতিষ্ঠানটোৰ ৫.৬৬ লাখ টকা হৰলুকী কৰি ঘটনাক চুৰি কাণ্ডৰ ৰূপ দিবলৈ নিজেই প্রতিষ্ঠানটোৰ কার্যালয়ৰ তলা ভঙাৰ লগতে নথিপত্র লণ্ডভণ্ড কৰে৷ পিছত ঘটনা সন্দর্ভত নাটকীয়ভাৱে দুয়োজনে ভঙাগড় থানাত এজাহাৰ দিবলৈ আহে৷ এজাহাৰৰ ভিত্তিত আৰক্ষীয়ে তদন্ত চলাই কর্মচাৰী দুজনক সোধা–পোছা কৰাত জোলোঙাৰ মেকুৰী ওলাই পৰে৷ ইপিনে ‘কুৰিয়াৰ ছার্ভিচ’ৰ তৰফৰ পৰা এই সন্দর্ভত ভঙাগড় থানাত পৃথকে এখন এজাহাৰ দাখিল কৰাত আৰক্ষীয়ে ভাৰতীয় দণ্ডবিধিৰ ৪৫৭/৩৮০/৪২০ ধাৰাত ৬৮/২০ নম্বৰত এটা গোচৰ ৰুজু কৰি বুধবাৰে নুনমাটিৰ জটিয়া অঞ্চলৰ হালধি মিলৰ পৰা লম্পট দুজনক গ্রেপ্তাৰ কৰে৷ আৰক্ষীয়ে ধৃত কর্মচাৰী দুজনৰ পৰা ৫,৩৮,২১০ টকাৰ লগতে প্রায় ১২ কেজি খুচুৰা পাইচা উদ্ধাৰ কৰে যদিও বাকী ধনখিনি উদ্ধাৰ কৰিব পৰা নাই৷ উল্লেখ্য যে ধৃত মুনীন্দ্র দাস আৰু অনুপ বর্মন ভঙাগড়ৰ চিলাৰায় নগৰস্থিত ‘এক্সপ্রেছ বি কুৰিয়াৰ’ ছার্ভিচৰ শাখা পৰিচালক আৰু বিষয়া হিচাপে কর্মৰত অৱস্থাত অকর্তৃত্বশীলভাৱে প্রতিষ্ঠানটোৰ বহু সা–সম্পত্তি ভোগ কৰি আছিল৷