📌 বলীউডৰ অভিনেত্রীৰ বক্তব্য ভাইৰেল
বিশেষ বাৰ্তা, ২৪ জুনঃ লিঅ’নেল মেছি নে ক্রিষ্টিয়ানো ৰ’নাল্ডো ? ইনষ্টাগ্রামত এই প্রশ্ন কৰা হৈছিল অভিনেত্রী ছানী লিয়নিক৷ এই প্রশ্নৰ সহজ উত্তৰ দি ছানিয়ে কয়- ‘আমাৰ সুনীল চেত্রী কেনে?’ এই উত্তৰৰ জৰিয়তে অভিনেত্রীগৰাকীয়ে সহজে বুজাই দিয়ে যে তেওঁৰ পছন্দৰ ফুটবলাৰ ভাৰতীয় অধিনায়কগৰাকী ৷ আর্জেণ্টিনাৰ মেছি অথবা পর্তুগালৰ ৰ’নাল্ডো নহয়, ছানীৰ পছন্দৰ ফুটবলাৰ সুনীল চেত্রী ৷ তেওঁ ছানীৰ দৰে বহু ভাৰতীয় সমর্থকৰ প্রিয় ফুটবলাৰ ৷ উল্লেখ্য যে ইনষ্টাগ্রামত ছানী অতিশয় জনপ্রিয় ৷ ইনষ্টাগ্রামত তেওঁৰ অনুসৰণকাৰীৰ সংখ্যা ৪০ মিলিয়ন ৷ সুনীল চেত্রীক লৈ ছানীৰ ইনষ্টা ষ্ট’ৰী নিমিষতে ভাইৰেল হয় ৷ এক বর্ণিল সময় অব্যাহত ৰাখিছে ভাৰতৰ অধিনায়ক সুনীলে ৷ নিয়মীয়াভাৱে তেওঁ গ’ল দি আহিছে৷ পাকিস্তানৰ বিৰুদ্ধে ছাফ চেম্পিয়নশ্বিপত হেটট্রিক কৰিছে তেওঁ৷ সুনীল চেত্রীৰ আন্তর্জাতিক মেচত গ’লৰ সংখ্যা হ’ল ৯০টা৷ এতিয়া সর্বাধিক গ’লদাঁতাৰ তালিকাত চতুর্থ স্থানত আছে সুনীল৷ ভাৰতীয় অধিনায়কগৰাকীৰ আগত আছে ৰ’নাল্ডো, আলী ডায়ী আৰু মেচি৷ অভিনেত্রীগৰাকীৰ উত্তৰ শুনি বহুতো সমর্থকে তেওঁক প্রশংসা কৰিছে ৷ এজন অনুৰাগীয়ে লিখিছে যে ছানীৰ এই উত্তৰে তেওঁৰ হূদয় জয় কৰিছে৷