৮০ শতাংশ ক’ৰোনাত আক্রান্ত বিপদমুক্ত

নিয়মীয়া বাৰ্তা, ১৯ ফেব্রুৱাৰীঃ মাৰাত্মক ক’ৰোনা ভাইৰাছত চীনত ৭০ সহস্রাধিক লোক আক্রান্ত হোৱা বুলি মঙলবাৰে বেইজিং প্রশাসনে ঘোষণা কৰিছে ৷ চীনৰ স্বাস্থ্য মন্ত্রালয়ৰ পৰা প্রথমবাৰৰ বাবে প্রকাশ কৰা হৈছে এক গুৰুত্বপূর্ণ প্রতিবেদন ৷ বিশ্ব স্বাস্থ্য সংস্থা(হু)ই ক’ভিড–১৯ নামেৰে নামকৰণ কৰা এই ক’ৰোনা ভাইৰাছৰ দ্বাৰা আক্রান্ত হোৱা ৮০ শতাংশ লোকৰ অৱস্থা সংকটমুক্ত ৷ চীনৰ ৰোগ নিয়ন্ত্রণ তথা প্রতিৰোধ কেন্দ্র (চিচিডিচি)ৰ তৰফৰ পৰা সদৰী কৰা হৈছে এই তথ্য ৷ ৮০ শতাংশ আক্রান্ত লোক কোনো ধৰণৰ সংকটৰ সন্মুখীন হোৱা নাই বুলি প্রতিবেদনত উল্লেখ কৰাৰ উপৰি ১৩.৮ শতাংশৰ অৱস্থা সংকটজনক আৰু ৪.৭ শতাংশৰ অৱস্থাত আটাইতকৈ জটিল বুলি ঘোষণা কৰা হৈছে ৷ ক’ৰোনাৰ সংক্রমণত আটাইতকৈ বেছি বয়োজ্যেষ্ঠ লোকে প্রাণ হেৰুৱাইছে ৷ ৮০ বা তাৰ ঊর্ধ্বৰ বয়সৰ প্রাণ হেৰুওৱা লোকৰ হাৰ ১৪.৮ শতাংশ৷ ইফালে, অন্য ৰোগত অসুস্থ হৈ থকা লোকসকল ক’ৰোনাৰ দ্বাৰা সংক্রমিত হোৱাৰ পিছত তেওঁলোকৰ জীৱন ৰক্ষা কৰাটো কঠিন হৈ পৰা বুলি ঘোষণা কৰিছে চিচিডিচিয়ে ৷ লক্ষণীয়ভাৱে ক’ৰোনা ভাইৰাছৰ সংক্রমণৰ অভিকেন্দ্র হিচাপে চিহ্ণিত হোৱা ৱুহানত কেইবাশও চিকিৎসক তথা স্বাস্থ্যকর্মীয়ো আক্রান্ত হৈছে ৷ মঙলবাৰে ৱুহানত প্রাণ হেৰুৱাইছে এখন হাস্পতালৰ এগৰাকী বিশিষ্ট চিকিৎসক তথা সঞ্চালকে ৷ এতিয়ালৈকে চীন তথা বিশ্বৰ বিভিন্ন দেশত এই মাৰাত্মক ভাইৰাছবিধৰ দ্বাৰা আক্রান্ত হৈ প্রাণ হেৰুৱাইছে ১৮ শতাধিক লোকে৷ অৱশ্যে চীনৰ ৱুহানতেই ক’ৰোনাত মৃত্যু হোৱা লোকৰ সংখ্যা আটাইতকৈ বেছি৷ ইউৰোপ আৰু আমেৰিকাত তিনিগৰাকী লোকে প্রাণ হেৰুৱাইছে যদিও এই তিনিওগৰাকী চীনৰ নাগৰিক৷ এছিয়াৰ দেশসমূহত শেহতীয়াকৈ ক’ৰোনা ভাইৰাছক লৈ বৃদ্ধি পাইছে অধিক সতর্কতা ৷