নিয়মীয়া বাৰ্তা, ১৯ ফেব্রুৱাৰীঃ ভাৰতীয় ক্রিকেট জগতৰ তাৰকা যুৱৰাজ সিং আৰু তেওঁৰ ভাতৃ জৰাৱাৰ সিঙৰ জীৱনৰ ওপৰত নির্মাণ হ’ব এখন ৱেব ছিৰিজ ৷ অসমৰ ড্রীম হাউছ প্রডাকচনৰ বেনাৰত প্রথম বাৰলৈ দেশৰ এগৰাকী প্রখ্যাত খেলুৱৈৰ জীৱনৰ ওপৰত নির্মাণ হ’ব ৱেব ছিৰিজ ৷ এই ৱেব ছিৰিজৰ লগত জডিত হৈ থাকিব ক্রিকেটাৰগৰাকীৰ মাতৃ শ্ববনম সিং ৷ যুৱৰাজ সিঙৰ পত্নী হাজেল কেইছকো দেখা যাব অভিনয়ত ৷ লগতে মুখ্য চৰিত্রত অভিনয় কৰিব যুৱৰাজ সিঙৰ ভাতৃয়ে ৷ অসমৰ লগতে উত্তৰ–পূবৰ বিভিন্ন ঠাইত হ’ব ৱেব ছিৰিজটোৰ দৃশ্যগ্রহণ ৷ মঙলবাৰে গুৱাহাটীত এক সংবাদ মেলযোগে সদৰী কৰে নির্মাতাসকলে ৷ সংবাদ মেলত উপস্থিত থাকে যুৱৰাজ সিঙৰ ভাতৃ জৰাৱাৰ সিং আৰু মাতৃ শ্ববনম সিং ৷ ছবিখন সম্পূর্ণৰূপে যুৱৰাজ সিঙৰ জীৱনৰ ওপৰত নহয় যদিও ছবিখনৰ মাধ্যমেৰে ক্রিকেটাৰগৰাকীৰ জীৱনৰ এক প্রতিচ্ছবি ফুটাই তোলাৰ চেষ্টা কৰা হ’ব বুলি কয় তেওঁৰ মাতৃয়ে ৷ ছবিখনত দুই ভাতৃৰ সম্পর্কৰ কিছু কাহিনী থাকিব ৷