বিশেষ বাৰ্তা, ১৮ অক্টোবৰঃ জনতা ভৱনত মুখ্যমন্ত্রী ড০ হিমন্ত বিশ্ব শর্মাৰ অধ্যক্ষতাত অনুষ্ঠিত ৰাজ্য চৰকাৰৰ কেবিনেট বৈঠকে কেইবাটাও গুৰুত্বপূর্ণ সিদ্ধান্ত গ্রহণ কৰে৷ সেই অনুসৰি চলিত বর্ষৰ ২৫ ডিচেম্বৰৰ পৰা অহা বছৰৰ ১০ জানুৱাৰীলৈ এটা পষেকৰ ভিতৰত অসম মন্ত্রীসভাৰ প্রতিগৰাকী মন্ত্রীয়ে ৰাজ্যখনৰ বিভিন্ন প্রান্তৰ গাঁৱত পাঁচ দিন পাঁচ ৰাতি কটাব৷ কেবিনেট বৈঠকৰ অন্তত এখন সংবাদ মেলত ৰাজ্য চৰকাৰৰ মুখপাত্র তথা জনস্বাস্থ্য কাৰিকৰী বিভাগৰ মন্ত্রী জয়ন্ত মল্ল বৰুৱাই এই কথা সদৰী কৰে৷ কেবিনেট সিদ্ধান্তৰ বিষয়ে সদৰী কৰি সংবাদ মেলখনত মন্ত্রী বৰুৱাই কয় যে এই কার্যসূচীৰ বাবে ইতিমধ্যে ৰাজ্যখনক পাঁচটা মণ্ডলত বিভক্ত কৰা হৈছে৷ সেই পাঁচটা মণ্ডল হৈছে– উজনি অসম, বিটিআৰক বাদ দি নামনি অসম, উত্তৰ অসম, বৰাক উপত্যকা–পার্বত্য জিলা আৰু বিটিআৰ৷ প্রত্যেকগৰাকী মন্ত্রীয়ে এদিনকৈ এই পাঁচটা মণ্ডললৈ উক্ত সময়ছোৱাত যাব আৰু তাত এটা নিশা কটাব৷ পাঁচটা বিভিন্ন অঞ্চলৰ পৰা পাঁচখন গাঁও বাছনি কৰিব আৰু সেই সময়ছোৱাত মন্ত্রীসকলে জনসাধাৰণৰ পৰা প্রাপ্ত পৰিপূর্ণতাৰ স্তৰ সাঙুৰি কল্যাণমূলক আঁচনিসমূহৰ ব্যৱহাৰিক ৰূপায়ণৰ মূল্যায়ন কৰিব৷ তদুপৰি এই সময়ছোৱাত উচ্চ আৰু উচ্চতৰ মাধ্যমিক বিদ্যালয়ৰ ৪০০ নতুন ভৱনৰ আধাৰশিলা স্থাপন কৰা হ’ব৷ এই ৪০০ বিদ্যালয়ৰ ভিতৰত ১০০খন বিদ্যালয় চাহ বাগিচা অধ্যুষিত অঞ্চলত সম্পূর্ণ নতুন বিদ্যালয় হিচাপে নির্মাণ কৰা হ’ব৷ বাকী ভিন্ন প্রান্তৰ ৩০০ বিদ্যালয়ৰ ক্ষেত্রত পুৰণি বিদ্যালয় ভৱন ৭ কোটি টকাকৈ ব্যয়েৰে নৱীকৰণ কৰা হ’ব৷ ২৫ ডিচেম্বৰৰ পৰা ১০ জানুৱাৰীৰ ভিতৰত সেই শিক্ষানুষ্ঠানসমূহৰ আধাৰশিলা মন্ত্রীসকলে স্থাপন কৰিব৷ সেইদৰে আজিৰ কেবিনেটে মিছন বসুন্ধৰা ২.০ৰ অধীনত চহৰাঞ্চলত আৱাস নির্মাণৰ উদ্দেশ্যে ১২৩টা খিলঞ্জীয়া ভূমিহীন পৰিয়ালক ভূমিপট্টা প্রদানৰ প্রস্তাৱত অনুমোদন জনায়৷ উক্ত ১২৩টা পৰিয়ালৰ ভিতৰত চৰাইদেউ জিলাৰ ১০৫টা আৰু দৰং জিলাৰ ১৮টা পৰিয়াল আছে৷ অনুৰূপ ধৰণে সংশ্লিষ্ট মহকুমা ভূমি উপদেষ্টা পৰিষদৰ অনুমোদন আৰু অভিভাৱক মন্ত্রীসকলৰ পর্যবেক্ষণৰ পাছত ইতিমধ্যে গ্রামাঞ্চলত ৫৫ হাজাৰতকৈ অধিক ভূমিহীন পৰিয়ালক ভূমিপট্টা প্রদানৰ প্রস্তাৱত অনুমোদন জনোৱা হৈছে৷ আনহাতে, আজিৰ কেবিনেটে কার্বি লাংপি মধ্য–২ জলবিদ্যুৎ প্রকল্প ৰূপায়ণৰ বাবে ৪১৭.৩২ কোটি টকাৰ সংশোধিত প্রকল্প ব্যয়ৰ প্রস্তাৱত অনুমোদন জনায়৷ উল্লেখ্য যে এই প্রকল্পটোৱে ৰাজ্যখনত বিদ্যুতৰ অভাৱ হ্রাস কৰাত সহায় কৰাৰ লগতে নৱীকৰণযোগ্য শক্তিৰ জৰিয়তে ৰাজ্যখনত চাহিদা আৰু যোগানৰ মাজৰ ব্যৱধান কিছু পৰিমাণে দূৰ কৰাত সহায় কৰিব৷ তদুপৰি এই প্রকল্পটো ক্ষুদ্র হাইড্র’ শ্রেণীৰ অন্তর্ভুক্ত হোৱাৰ ফলত ই পৰিৱেশ তন্ত্রৰ ক্ষতি যথেষ্ট হ্রাস কৰিব৷ আনহাতে, আজিৰ কেবিনেটে এইচপিচিএলৰ সম্পদ কার্যকৰীসংগতভাৱে ব্যৱহাৰৰ উদ্দেশ্যে সম্পত্তি অধিগ্রহণ আৰু সাহায্য পেকেজ পৰিষদৰ বাবে অসম চৰকাৰৰ প্রদত্ত সাহায্য অনুদানৰ অধীনত ৭৫৮.৭৫ কোটি টকাৰ বিনিয়োগ এআইডিচিৰ অসম চৰকাৰৰ দ্বাৰা ইকুইটি বিনিয়োগ হিচাপে ৰূপান্তৰ কৰাৰ প্রস্তাৱত অনুমোদন জনায়৷ অসম চৰকাৰৰ প্রস্তাৱিত বিনিয়োগৰ বাবে এআইডিচিৰ অনুমোদিত শ্বেয়াৰ মূলধনৰ সীমা বর্তমানৰ ১৫০ কোটিৰ পৰা ১,০০০ কোটি টকালৈ বৃদ্ধি হ’ব৷ এআইডিচি এক মুখ্য ঔদ্যোগিক উন্নয়ন নিগম হিচাপে শক্তিশালী ৰূপত গঢ়ি তোলাৰ বাবেই কেবিনেটে এই পদক্ষেপ গ্রহণ কৰে৷ সেইদৰে বিত্তীয় অৱস্থা শক্তিশালীকৰণৰ হেতু অসম বিত্তীয় নিগমৰ ২০২৩ৰ ৩১ মার্চলৈ ৫৪ কোটি টকাৰ বকেয়া ঋণ আৰু ১০.৯২ কোটি টকা বকেয়া সুত নিগমৰ ইকুইটি মূলধনলৈ ৰূপান্তৰ কৰাৰ প্রস্তাৱত অনুমোদন জনায়৷ ই নিগমৰ ইকুইটি মূলধনী আধাৰৰ ব্যৱধান হ্রাস কৰাৰ লগতে ইয়াক এমএছএমই, মাইক্র’ ফাইনেঞ্চ, পর্যটন, স্বাস্থ্য সেৱা, উৎপাদন আদিৰ দৰে বিভিন্ন খণ্ডত ঋণ প্রদান কার্য অব্যাহত ৰাখিবলৈ আৰু যথা সময়ত আত্মস্থিৰতা প্রাপ্ত কৰাত সহায় কৰিব৷ ইপিনে, আজিৰ কেবিনেটে ২০২৪ চনৰ ১ জানুৱাৰীৰ পৰা কার্যকৰী হোৱাকৈ স্বাস্থ্য বিভাগৰ অধীনৰ চিকিৎসকসকলক প্রতি পাঁচ বছৰৰ সেৱা ম্যাদত এবাৰকৈ নন প্রেকটিচিং এলাউন্সৰ ‘অপ্ট–ইন’ আৰু ‘অপ্ট–আউট’ৰ সুবিধা প্রদান কৰাৰ প্রস্তাৱত অনুমোদন জনায়৷ চিকিৎসা আৰু স্বাস্থ্য বিষয়া–১ পদবীৰ পৰা স্বাস্থ্য সেৱা সঞ্চালক পদবীলৈ স্বাস্থ্য বিভাগৰ অধীনত কাম কৰা সকলো চিকিৎসকৰ বাবে এনপিএ আৰম্ভ কৰা হ’ব৷ এই উদগনিয়ে চিকিৎসকসকলক ব্যক্তিগত অনুশীলন কৰিব নোৱাৰাৰ পৰিস্থিতিত বিত্তীয় অভাৱৰ বিষয়ে চিন্তা নকৰাকৈ ৰোগীসকলক উচ্চমানৰ সেৱা প্রদান সুনিশ্চিতকৰণত উৎসাহ যোগাব৷ আনহাতে, আজিৰ কেবিনেটে চৰকাৰী অধিবক্তাৰ নিযুক্তি নিয়মীয়া কৰাৰ সিদ্ধান্ত গ্রহণ কৰে৷ ৰাজ্যত গোচৰৰ প্রণালী সুশৃংখলিত কৰিবলৈ অসম ৰাজ্যিক অভিযোজন সেৱা বিধি–২০২৩ প্রস্তুত কৰি প্রচিকিউচন সেৱাৰ এক নতুন কেডাৰ সৃষ্টি কৰিব৷ অসম ৰাজ্যিক অভিযোজন সেৱা বিধিৰ প্রস্তুতকৰণেৰে কম্পিটিটিভ পে’ স্কেলৰ সৈতে ৰাজহুৱা অধিবক্তা, অতিৰিক্ত ৰাজহুৱা অধিবক্তা, বিশেষ ৰাজহুৱা অধিবক্তা আৰু সহকাৰী ৰাজহুৱা অধিবক্তাৰ নিয়মীয়া কেডাৰ সৃষ্টি কৰা হ’ব৷ নিযুক্তিপ্রাপ্তসকল নিয়মীয়া চৰকাৰী কর্মচাৰী হ’ব আৰু সকলো বিদ্যমান ছুটী, সম্পাদন, ভ্রমণ, অনুশাসন আৰু আবেদন আৰু বিত্তীয় নিগম সাপেক্ষ হ’ব৷ এই প্রচিকিউচন কেডাৰ সৃষ্টিয়ে গোচৰ আৰু তদন্ত দলৰ মাজত সমন্বয় বৃদ্ধি কৰাৰ লগতে অপৰাধী ন্যায় ব্যৱস্থাৰ সফলতা সুনিশ্চিত কৰিব৷ সেইদৰে আজিৰ কেবিনেটে সকলো অংগনৱাড়ী কর্মী আৰু সহায়িকাৰ সেৱা ত্যাগ কৰা (অৱসৰ)ৰ বয়স ৬০ বছৰ হ’লেও তেওঁলোকৰ অৱসৰৰ তাৰিখ বছৰটোৰ ৩০ এপ্রিল নির্ধাৰণ কৰে৷ একেদৰে ৰাজ্যত সমষ্টি পুনৰ নির্ধাৰণ হৈ যোৱাৰ পাছত আজি জলসিঞ্চন বিভাগক ষষ্ঠ অনুসূচীৰ বাহিৰে বিভাগটোৰ প্রশাসনিক গোটসমূহ ক্রমে চক্র, সংমণ্ডল আৰু উপ–সংমণ্ডলসমূহ নতুন বিধানসভা সমষ্টি ভিত্তিত পুনৰ সংগঠিত কৰাত কেবিনেটে অনুমোদন জনায়৷