🔹 গুজৰাট–বেংগল-ৰাজস্থানত সর্প–বিহৰ অবাধ বেহা
🔹 ইউটিউবাৰ এলভিছ যাদৱৰ বিতর্কৰ পিছতে তদন্তকাৰী আৰক্ষীৰ ভয়াৱহ তথ্য লাভ
বিশেষ বাৰ্তা, ৫ নৱেম্বৰ : “উত্তৰ প্রদেশৰ নয়দাৰ ছেক্টৰ–৪৯ত ৰেভ পার্টীৰ সৈতে জনপ্রিয় ইউটিউবাৰ তথা বিগ বছ খ্যাত এলভিছ যাদৱ সাঙোৰ খোৱাৰ পিছতেই তদন্তকাৰী আৰক্ষীয়ে সাপৰ চোৰাং বেহা আৰু সর্প-বিহক লৈ চলোৱা তদন্তত ভয়াৱহ তথ্য পোহৰলৈ আহিছে৷ সাপৰ চোৰাং বেহা আৰু সর্প বিহেৰে ড্রাগ্ছ প্রস্তুত কৰি ইয়াৰ বেহা চলাই থকাৰ বিস্ফোৰক তথ্য তদন্তকাৰী আৰক্ষীয়ে পোহৰলৈ আনিবলৈ সক্ষম হৈছে ৷ তথ্য অনুসৰি, থাইলেণ্ডৰ পৰা বাংলাদেশ তথা নেপাল হৈ ভাৰতলৈ চলি আছে সর্পৰ চোৰাং বেহা ৷ সর্পৰ পৰা বিহ উলিয়াই ইয়াৰ পৰা ড্রাগ্ছ প্রস্তুত কৰি পিছলৈ ইয়াক দেশৰ বিভিন্ন প্রান্তত চোৰাংভাৱে বিক্রী কৰা হয়৷ এই চোৰাং সর্পৰ বেহাত জড়িতসকলে বিভিন্ন ধৰণৰ ক’ড ৱর্ড ব্যৱহাৰ কৰি আন্তর্জাতিক চোৰাং চক্র এটাৰ সৈতে জড়িত হৈ আছে৷ থাইলেণ্ডৰ পৰা ভাৰতলৈ সর্প-বিহ অহাৰ লগতে স্থানীয়ভাৱে ৰাজস্থান, গুজৰাট আৰু বেংগলতো এনেধৰণৰ সর্প-বিহৰ চোৰাং বেহা চলি আছে৷ মন কৰিবলগীয়া যে ইউটিউবাৰ যাদৱে ৰেভ পার্টীৰ জৰিয়তে সর্প-বিহ আৰু সর্পৰ ব্যৱসায়ৰ সৈতে জড়িত চক্রৰ সৈতে সম্পর্ক থকা বুলি বিজেপি সাংসদ তথা পৰিৱেশবিদ মানেকা গান্ধীয়ে অভিযোগ কৰাৰ উপৰি যাদৱক গ্রেপ্তাৰৰ দাবী জনাইছিল৷ নয়দাৰ ৰেভ পার্টীত ফেঁটীসহ ৯ডাল সাপ উদ্ধাৰ কৰা হৈছিল৷ তদন্তকাৰী আৰক্ষীয়ে সর্পৰ চোৰাং বেহাৰ তথ্য লাভ কৰাৰ পিছত সক্রিয় হৈ কালি ৰাজস্থানৰ কোটা আৰক্ষীয়ে এলভিছ যাদৱক গ্রেপ্তাৰ কৰিছে৷ বন্যপ্রাণী আইনৰ লগতে ভাৰতীয় দণ্ডবিধিৰ বিভিন্ন ধাৰাত এলভিছৰ লগতে তেওঁৰ সহযোগী পাঁচজনৰ বিৰুদ্ধে গোচৰ ৰুজু কৰা হৈছে৷