নিয়মীয়া বাৰ্তা, ২৫ জানুৱাৰীঃ মাৰ্ঘেৰিটা সমষ্টিৰ পৰা অসম লোক সেৱা আয়োগৰ পৰীক্ষাত সফলতা অৰ্জন কৰা ৮গৰাকী কীৰ্তিমানক মাৰ্ঘেৰিটাৰ কেটেতঙত বিপুল সম্বৰ্ধনা জ্ঞাপন কৰা হয়। কেটেতং উন্নয়ন যুৱ মঞ্চৰ উদ্যোগত কেটেতংস্থিত ৰাজহুৱা ৰংগমঞ্চত বিশেষ সম্বৰ্ধনা আৰু মতবিনিময় অনুষ্ঠানৰ আয়োজন কৰে। সদ্যঘোষিত অসম লোক সেৱা আয়োগৰ পৰীক্ষাত সুখ্যাতিৰে উত্তীৰ্ণ হৈ মাৰ্ঘেৰিটালৈ গৌৰৱ কঢ়িয়াই অনা বনিতা চেতিয়া, ৰাজ ছেত্ৰী, কমলেশ কুমাৰ গুপ্তা, সুৰজ গুপ্তা, দৰ্শন উপাধ্যায়, গায়িকা দেউৰী, হেমেন চিংফৌ আৰু আম চাউফে টুমটেনক আনুষ্ঠানিকভাৱে সম্বৰ্ধনা জ্ঞাপন কৰা হয়। শিক্ষক সঞ্জীৱ উলুপে আঁত ধৰা অনুষ্ঠানত অসম গৌৰৱ মাঞ্জে লা, মাৰ্ঘেৰিটাৰ বিধায়ক ভাস্কৰ শৰ্মা, যুৱ সাংবাদিক মানসপ্ৰতিম গগৈসহ কেইবাগৰাকীও গণ্যমান্য ব্যক্তি থকা অনুষ্ঠানত মাৰ্ঘেৰিটাৰ বিভিন্ন দল সংগঠনৰ ওপৰিও স্থানীয় ৰাইজে কীৰ্তিমানকেইগৰাকীক সম্বৰ্ধনা জ্ঞাপন কৰা লগতে তেওঁলোকৰ সৈতে মত বিনিময় কৰে।
প্ৰেৰক মানস প্ৰতিম গগৈ