নিয়মীয়া বার্তা ২৬ ফেব্রুৱাৰীঃ মিছ ইণ্ডিয়া ২০২০ৰ সৌন্দর্য প্রতিযোগিতাত শীর্ষ দহৰ অষ্টম স্থানত জিলিকি উঠিল ওদালগুৰি জিলাৰ মাজবাটৰ মালেশ্যা কাশ্যপ৷ ‘মিছ নর্থ ইষ্ট দিবা ২০১৯–২০’ৰ চূড়ান্ত বিজয়ী অসম কন্যাগৰাকীয়ে পোনপতীয়া অংশগ্রহণকাৰী ৰূপে মুম্বাইত অনুষ্ঠিত মিছ ইণ্ডিয়া প্রতিযোগিতালৈ নিবাচিত হয়৷ অসম তথা উত্তৰ–পূর্বাঞ্চলক গৌৰৱোজ্জ্বল কৰি সন্মান আৰু কৃতিত্ব কঢ়িয়াই গৃহাভিমুখী হোৱা মালেশ্যাক কালি ওৰাঙত শুভেচ্ছা জ্ঞাপন কৰা হয়৷ সন্ধিয়া ৭.৩০ বজাত ওৰাং সামূহিক স্বাস্থ্য কেন্দ্রত ফুলাম গামোচাৰে মালেশ্যাক
সন্মান, শুভকামনা যাঁচে চিকিৎসা তথা স্বাস্থ্য বিষয়া ডাঃ ৰাজু ব্রহ্ম, খণ্ড আঁচনিৰ প্রবন্ধক পংকজ সভাপণ্ডিত, জ্যেষ্ঠ এ এন এম আল্পনা বিশ্বাস, সাংবাদিক অতুল চন্দ্র নাথ প্রমুখ্যে ব্যক্তিসকলে৷ উল্লেখ্য যে মালেশ্যাই মিছ বডী বিউটিফুল মিছ টেলেণ্টেড আৰু নেচনেল বেষ্ট কষ্টিউম সন্মানেৰে উদ্ভাসিত হয়৷ মালেশ্যা মাজবাট টাউন নিৱাসী প্রয়াত ধীৰাজ ডেকা আৰু অর্চনা ডেকাৰ কন্যা তথা গুৱাহাটী প্রাগজ্যোতি কলেজৰ উচ্চতৰ মাধ্যমিকৰ ছাত্রী৷