🔹 বকো থানাত এজাহাৰ দাখিল
নিয়মীয়া বাৰ্তা, ২২ মাৰ্চ : কামৰূপ জিলাৰ বকো-ছয়গাঁও বিধানসভা সমষ্টিৰ অন্তৰ্গত ২নং মাকেলীৰ এগৰাকী মূকবধিৰ মহিলা নিৰুদ্দেশৰ ঘটনাই তীব্ৰ চাঞ্চল্যৰ সৃষ্টি কৰিছে। জানিব পৰা মতে, বকোৰ ২নং মাকেলীৰ এছাৰুল বিবি নামৰ এগৰাকী মূকবধিৰ মহিলা ২১ মাৰ্চৰ পুৱা প্ৰায় ৮ বজাৰ পৰা পিতৃগৃহৰ পৰা নিৰুদ্দেশ হৈ আছে। এছাৰুল বিবিৰ ভাতৃ তৈয়াৱ আলীয়ে সংবাদ মাধ্যমক জনোৱা অনুসৰি, ২১ মাৰ্চ সোমবাৰে পুৱাৰে পৰা এছাৰুল বিবি নামৰ মহিলাগৰাকী পিতৃগৃহৰ পৰা নিৰুদ্দেশ হৈ আছে। মূকবধিৰ মহিলাগৰাকীক পৰিয়ালৰ লোকে কালিৰ পৰা বহু ঠাইত বিচাৰিছে যদিও বৰ্তমানলৈ মহিলাগৰাকীৰ সন্ধান নাপাই শোকত ভাগি পৰিছে তেওঁৰ সন্তানসহ পৰিয়াল। আজি এছাৰুল বিবি নিৰুদ্দেশ সম্পৰ্কে ভাতৃ তৈয়াৱ আলীয়ে বকো আৰক্ষী থানাত এখন এজাহাৰ দাখিল কৰে। এছাৰুল বিবিৰ এটি নৱম শ্ৰেনীত অধ্যয়নৰত কন্যা সন্তান আছে। এছাৰুল বিবিৰ বয়স ৫০ বছৰ আৰু তেওঁৰ শৰীৰৰ বৰণ ক’লা বুলি জানিব পৰা গৈছে। স্বামী ঢুকোৱাৰ পিছৰে পৰা এছাৰুল বিবি নামৰ মহিলাগৰাকী ২নং মাকেলীৰ পিতৃগৃহত আছিল।মূকবধিৰ মহিলাগৰাকীৰ কোনোবাই কিবা সন্ধান পালে ৯৬৭৮৮৪৯৭৭৬ নম্বৰত যোগাযোগ কৰিবলৈ অনুৰোধ জনাইছে ভাতৃ তৈয়াৱ আলীয়ে।
প্ৰেৰক প্ৰীতম বায়ন