🔹 বৃহৎ অংকৰ ঋণৰ বোজা মাণ্ডিৰ বিজেপি প্রার্থীৰ
বিশেষ বাৰ্তা, ১৬ মে’ : চলচ্চিত্র জগতত জনপ্রিয়তা হ্রাস পাই অহাৰ বাবেই ৰাজনীতিৰ পথাৰত ভৰি দিছে অভিনেত্রী কংগনা ৰাণাৱটে৷ লোকসভা নির্বাচনত হিমাচল প্রদেশৰ মাণ্ডি সমষ্টিৰ পৰা বিজেপিৰ প্রার্থী হিচাপে প্রতিদ্বন্দ্বিতা কৰিছে কংগনাই৷ আগন্তুক ১ জুনত এই সমষ্টিটোত নির্বাচন অনুষ্ঠিত হ’ব৷ তাৰ পূর্বেই মনোনয়ন–পত্র দাখিল কৰে অভিনেত্রীগৰাকীয়ে৷ স্থাৱৰ আৰু অস্থাৱৰ সম্পত্তি মিলি কংগনাৰ মুঠ সম্পত্তিৰ পৰিমাণ ৯১ কোটি টকা৷ এই বিশাল সম্পত্তিৰ অধিকাৰী হৈও বহু ঋণৰ বোজাত ডুব গৈ আছে কংগনা ৰাণাৱট৷ শপতনামাত উল্লেখ কৰা অনুসৰি মাণ্ডিৰ বিজেপি ষ্টাৰ প্রার্থীৰ অস্থাৱৰ সম্পত্তিৰ পৰিমাণ প্রায় ২৮.৭ কোটি টকা৷ ইয়াৰ ভিতৰত হাতত আছে নগদ ২ লাখ টকা৷ আনফালে বেংকত যি জমা আছে তাৰ সৈতে বণ্ড, এলআইচি আদি মিলি আছে প্রায় ১৪.১৮ কোটি টকা৷ কিন্তু অভিনেত্রীগৰাকীৰ সংগ্রহত থকা সোণ, ৰূপ আৰু হীৰাৰ অলংকাৰৰ বজাৰ মূল্য শুনিলে হতবাক হ’বলগীয়া কথা৷ ৬.৭ কিঃগ্রাম সোণৰ গহনা আছে কংগনা ৰাণাৱটৰ হাতত৷ ইফালে ৬০ কিঃগ্রাম ৰূপৰ গহনা আছে অভিনেত্রীগৰাকীৰ৷ ইফালে হীৰাৰ অলংকাৰ আছে ৩ কোটি টকাৰ৷ অর্থাৎ কেৱল অলংকাৰেই আছে ৮ কোটি ৫০ লাখ টকাৰ৷ কংগনাৰ স্থাৱৰ সম্পত্তিৰ পৰিমাণ ৬২.৯ কোটি টকা৷ শপতনামাত অভিনেত্রীগৰাকীয়ে উল্লেখ কৰা অনুসৰি দেশৰ বিভিন্ন স্থানত তেওঁৰ সম্পত্তি আছে৷ মুম্বাইত আছে ১৬ কোটি টকাৰ ৩টা ঘৰ, মানালিত আছে ১৫ কোটি টকাৰ বাংলো৷ ইফালে চণ্ডীগড়, মুম্বাই আৰু মানালিত ৬টা স্থানত আছে ভূমি৷ ৫৮ লাখ টকাৰ এখন বিএমডব্লিউ গাড়ী, ৩.৯১ কোটি টকাৰ দুখন মার্চিডিছ আৰু ৫৩ হাজাৰ টকাৰ এখন ভেস্পা স্কুটী আছে কংগনাৰ৷ অৱশ্যে ৯১ কোটি টকাৰ সম্পত্তি থাকিলেও বৃহৎ অংকৰ ধনৰ ঋণ আদায় দিবলৈ আছে কংগনাই৷ ১৭ কোটি টকাৰ ঋণ আদায় দিব লগা আছে অভিনেত্রীগৰাকীয়ে৷