নিয়মীয়া বাৰ্তা, ১৫ অক্টোবৰঃ বজালীৰ এগৰাকী বয়োজ্যেষ্ঠা নামতি সমাজসেৱী, বজালী জিলা সদৰ পাঠশালা নিৱাসী সৰবৰহী মহিলা জয়মতী ডেকাৰ আজি বাৰ্ধক্যজনিত পৰলোকপ্ৰাপ্তি ঘটে৷ বিশিষ্টা মহিলাগৰাকীৰ পাঠশালাস্থিত নিজ বাসভৱনত ৯৪ বছৰ বয়সত পৰলোক প্ৰাপ্তি ঘটা খবৰে সমগ্ৰ অঞ্চলটোতে শোকৰ ছাঁ পেলাইছে৷ ভাৰতৰ স্বাধীনতা আন্দোলনৰ সক্ৰিয় কৰ্মী, মুক্তিযোদ্ধা বজালীৰ কলৰগুৰিৰ প্ৰয়াত কমলেশ্বৰ মজুমদাৰৰ জীয়ৰী তথা হাঠিনাপুৰ বাগনাৰ প্ৰয়াত যোগেন ডেকাৰ সহধৰ্মিনী মহিলাগৰাকী বিগত কিছুমাহৰ পৰা শয্যাগত হৈ আছিল যদিও সুস্থ অৱস্থাত থকা সময়ছোৱাত বিভিন্ন ধৰ্মমূলক কামৰ সতে ওতপ্ৰোতঃ ভাৱে জড়িত আছিল৷ মৃত্যুৰ সময়ত পাঠশালাৰ আনন্দৰাম বৰুৱা একাডেমিৰ ৰেক্টৰ তথা পৰিচালন সঞ্চালক আৰু অসম গণ পৰিষদৰ উপ-সভাপতি ড০ ৰণজিৎ ডেকাসহ সাতগৰাকী পুত্ৰ, আঠগৰাকী বোৱাৰী, নাতি নাতিনীসহ অনেক গুণমুগ্ধক ইহসংসাৰত এৰি থৈ যায়৷ আজি দিনৰ ভাগত শেষকৃত্য সম্পন্ন কৰা সৰবৰহী মহিলাগৰাকীৰ মৃত্যুত মন্ত্ৰী ৰঞ্জিত কুমাৰ দাস, জয়ন্ত মল্ল বৰুৱা, সৰুক্ষেত্ৰী সমষ্টিৰ বিধায়ক জাকিৰ হুছেইন সিকদাৰ, আনন্দৰাম বৰুৱা একাডেমিৰ সমূহ শিক্ষক-শিক্ষয়িত্ৰী আৰু কৰ্মচাৰীবৃন্দ, অগপৰ বজালী বিধান সভা সমষ্টি সমিতি, পাঠশালা প্ৰেছ ক্লাব, বজালী জিলা বাৰ্তাজীৱী সংঘ, বজালী জিলা সাংবাদিক সংস্থা, অসম সৌৰভ কৃষ্ণ ৰয়, প্ৰাগজ্যোতিষ ক্লাব, পাটাছাৰকুছি প্ৰেছ ক্লাব, শান্তিবজাৰ সমিতি, পুঠিমাৰী শ্ৰীশ্ৰী লক্ষ্মীপূজা সমিতি, পাঠশালা ৰিক্সা-ঠেলা চালক সন্থা, হস্তিনাপুৰ ৰঙালী বিহু সন্মিলনী, কলৰগুৰি গঞা গয়ৰহ, ভকতৰভিঠা গঞা ৰাইজ, বালাপাৰা সাৰ্বজনীন ৰঙালী বিহু সন্মিলনী, বালাপাৰা শ্ৰীশ্ৰীশ্যামা পূজা মহোৎসৱ, বামুণকুচি গাঁও উন্নয়ন সমিতিকে আদি কৰি বিভিন্ন অনুষ্ঠান-প্ৰতিষ্ঠান তথা ব্যক্তিয়ে শোক প্ৰকাশ কৰি বিশিষ্টা নামতিগৰাকীৰ বিদেহ আত্মাৰ চিৰশান্তি কামনা কৰে৷
প্ৰেৰক কল্যাণ কলিতা