নিয়মীয়া বাৰ্তা ডিজিটেল, ১৮ অক্টোবৰঃ বর্ণিল কেৰিয়াৰত আন এক কৃতিত্ব অর্জন কৰিলে টীম ইণ্ডিয়াৰ তাৰকা বেটাৰ বিৰাট কোহলিয়ে৷ টেষ্ট ক্রিকেটত ৯০০০ ৰান সম্পূর্ণ কৰি ভাৰতৰ চতুর্থগৰাকী বেটাৰৰূপে গৌৰৱ অর্জন কৰে কোহলিয়ে৷ সম্প্রতি বেংগালুৰুত নিউজিলেণ্ডৰ বিপক্ষে খেলি থকা প্রথমখন টেষ্টৰ আজি তৃতীয় দিনা দ্বিতীয় ইনিংছত ৫৩ ৰান কৰাৰ লগে লগে টেষ্ট ক্রিকেটত ৯,০০০ ৰান সম্পূর্ণ কৰে তাৰকা বেটাৰগৰাকীয়ে৷ ১১৬খন টেষ্ট মেচৰ ১৯৭টা ইনিংছত কোহলিয়ে এই মাইলষ্ট’নত প্রৱেশ কৰে৷ ২০০খন টেষ্টত ১৫,৯২১ ৰান কৰি এই তালিকাৰ শীর্ষত আছে কিংবদন্তি ক্রিকেটাৰ শচীন তেণ্ডুলকাৰ৷ আনহাতে ১৬৩খন টেষ্টত ১৩,২৮৮ ৰান কৰি ৰাহুল দ্রাবিড়ে দ্বিতীয় আৰু ১২৫খন টেষ্টত ১০,১২২ ৰান কৰি সুনীল গাভাস্কাৰে তৃতীয় স্থান অধিকাৰ কৰি আছে৷ আজি ব্যক্তিগত ৭০ ৰানত পেভিলিয়নমুখী হোৱা কোহলিয়ে ৯,০১৭ৰান সংগ্রহ কৰি চতুর্থ স্থানত আছে৷