নিয়মীয়া বাৰ্তা, ৯ মাৰ্চঃ বিশ্বজুৰি এতিয়া ক’ৰোনা ভাইৰাছৰ আতংক । ক’ৰোনাৰ আতংকত এতিয়া কম্পিত ইৰান । ইৰানত বৰ্তমানলৈকে মৃত্যু হৈছে ১৯৪ জনকৈ লোকৰ । ইৰানত ক’ৰোনাৰ এই সংহাৰৰ পাচতে এতিয়া দেশখনৰ এখন হোটেলত আবদ্ধ হৈ থকা ২২ গৰাকী ভাৰতীয়ই কাতৰ আহ্বান জনালে চৰকাৰলৈ । জম্মু কাশ্মীৰ, কেৰালা, তামিলনাডুৰ পৰা ইৰানলৈ যোৱা ২২ গৰাকী লোক এতিয়া আবদ্ধ হৈ আছে বুছাৰ হোটেলত ।
ইৰানৰ এটা জাহাজ কোম্পানীত কৰ্মৰত এইকেইজন লোকে উদ্ধাৰৰ বাবে কাতৰ আহ্বান জনাইছে চৰকাৰক । ইতিমধ্যে ভাৰতলৈ আহিবলৈ বিমান বাতিল হোৱাৰ বাবে তেওঁলোকে ভাৰতীয় দূতাবাসৰ সৈতে যোগাযোগ কৰিও কোনোধৰণৰ সহায় পোৱা নাই বুলি উল্লেখ কৰে ।
উল্লেখ্য যে, বৰ্তমানলৈকে ইৰানত ক’ৰোনা ভাইৰাছত আক্ৰান্ত হৈ মৃত্যু হৈছে প্ৰায় ১৯৪ জনৰ, আক্ৰান্তৰ সংখ্যা হৈছে ৬৫৬৬ জন ।