🔹 টেক্সাছত বিশাল প্রাসাদ ক্রয় মার্কিন ধনকুবেৰৰ
নিউজ ডেস্ক, ২ নৱেম্বৰ : ১১ সন্তান আৰু প্রাক্তন পত্নী তথা প্রেমিকাসকলৰ সৈতে একেলগে থকাৰ বাবে ১৪ হাজাৰ বর্গফুটৰ এটা প্রাসাদ ক্রয় কৰিছে মার্কিন ধনকুবেৰ এলন মাস্কে৷ নিজৰ পৰিয়ালক একেলগে ৰখাৰ লগতে সকলো সন্তানক চোৱাচিতা কৰাৰ বাবে টেক্সাছত এই বিশাল প্রাসাদটো ক্রয় কৰিছে মাস্কে৷ নিউৰালিংক, স্পেছএক্সৰ মালিক ৫২ বছৰীয়া মাস্কে বিচাৰে তেওঁৰ সকলো সন্তানে সমিলমিলেৰে একেলগে বাস কৰাটো৷ নিউয়র্ক টাইমছৰ প্রতিবেদনত উল্লেখ কৰা হৈছে যে ২৯৫ কোটি টকা খৰচ কৰি টেক্সাছৰ অষ্টিনত বিলাসবহুল প্রাসাদটো ক্রয় কৰিছে বিশ্বৰ আটাইতকৈ ধনী ব্যক্তিগৰাকীয়ে৷ টেক্সাছৰ যি প্রাসাদত বর্তমান মাস্কে বসবাস কৰি আছে তাৰ পৰা মাত্র ১০ মিনিট দূৰত্বত এই প্রাসাদটো ক্রয় কৰিছে৷ ২০০২ চনত প্রথম পিতৃত্বৰ গৌৰৱ অৰ্জন কৰে এলন মাস্কে৷ ২০২৪ চনত নিজৰ ১২ সংখ্যক সন্তানৰ পিতৃ হয় মাস্ক৷ ২২ বছৰত মুঠ ১২টা সন্তানৰ পিতৃ হোৱাৰ সৌভাগ্য হৈছে মাস্কৰ৷ অৱশ্যে নিজৰ প্রথম সন্তান নেভাডা আলেকজেণ্ডাৰৰ জন্মৰ ১০ সপ্তাহৰ ভিতৰতে মৃত্যু হৈছিল৷ সেই ঘটনাৰ পিছত নিজৰ প্রথম পত্নী জাষ্টিন মাস্কৰ গর্ভত এলনৰ ৫ সন্তান জন্ম হয় আইভিএফৰ জৰিয়তে৷ জাষ্টিনৰ সৈতে বিবাহ বিচ্ছেদৰ পিছত এলন মাস্কে ২০০৮ চনত অভিনেত্রী তালুলা ৰিলৰ সৈতে সম্পর্ক গঢ়ি তোলে৷ অৱশ্যে তালুলাৰ কোনো সন্তান নাই৷ ইয়াৰ পিছত গ্রাইমছ আৰু ক্লেয়াৰ বাউচাৰৰ সৈতে বৈবাহিক সম্পর্ক গঢ়ি তোলে এলনে৷ ক্লেয়াৰৰ সৈতে তিনি সন্তান থকাৰ উপৰি ছিভন জিল্লিছৰ সৈতে আছে মাস্কৰ যমজ সন্তান৷ ছিভন নিউৰালিংকৰ অন্যতম পদত কর্মৰত৷