নিউজ ডেস্ক, ২ নৱেম্বৰ : ভাৰত আৰু নিউজিলেণ্ডৰ মাজত কালিৰে পৰা ৱাংখেড়েত আৰম্ভ হৈছে তৃতীয় তথা অন্তিমখন টেষ্ট৷ এই টেষ্টৰ প্রথম দিনটোত ঘৰুৱা দলটোৰ তাৰকা অলৰাউণ্ডাৰ ৰবীন্দ্র জাদেজাই পাঁচটাকৈ উইকেট দখল কৰি স্থাপন কৰে অভিলেখ৷ জাদেজাই মুম্বাই টেষ্টৰ প্রথম ইনিংছত নিউজিলেণ্ডৰ ৫টাকৈ উইকেট দখল কৰি টেষ্টত পঞ্চম সর্বাধিক উইকেট দখলকাৰীত পৰিণত হয়৷ জাদেজাই খেলখনৰ ৫৩সংখ্যক অভাৰত গ্লেন ফিলিপছৰ (১৭) ৰূপত তৃতীয়টো উইকেট দখল কৰি এই কৃতিত্ব অর্জন কৰে৷ সমান্তৰালকৈ ভাৰতৰ হৈ পঞ্চম সর্বাধিক টেষ্ট উইকেট সংগ্রহকাৰীত পৰিণত হোৱাৰ লগতে জাহিৰ খান (৩১১) আৰু ঈশান্ত শর্মা (৩১১)ক অতিক্রম কৰে৷ জাদেজাই প্রতিপক্ষৰ বেটছমেন উইল ইয়ং (৭১), টম ব্লুণ্ডেল (০), গ্লেন ফিলিপছ (১৭), ঈশ সোধী (৭) আৰু মেট হেনৰী (০)ৰ উইকেট দখল কৰে৷ জাদেজাই ২২ অভাৰত ৬৫ ৰানৰ বিনিময়ত দখল কৰে ৫টা উইকেট৷ যাৰ বাবে দলটোক ২৩৫ ৰানত বান্ধি ৰাখিবলৈ সক্ষম হয় ভাৰত৷ টেষ্ট মেচত ভাৰতৰ হৈ সর্বাধিক উইকেট দখলকাৰীসকল হ’ল অনিল কুম্বলে (৬১৯), ৰবিচন্দ্রন অশ্বিন (৫৫৩), কপিল দেৱ (৪৩৪), হৰভজন সিং (৪১৭) আৰু ৰবীন্দ্র জাদেজা (৩১৪)৷