নিউজ ডেস্ক, ২৪ নৱেম্বৰ : পাকিস্তানৰ খাইবাৰ পাখতুনখাৱাত সাম্প্রদায়িক সংঘর্ষত ৩২জন লোক নিহত হোৱাৰ লগতে ৩০জন লোক আহত হৈছে৷ প্রদেশখনৰ কুৰাম জিলাৰ আলিজা আৰু বাগান অঞ্চলৰ দুটা জনজাতিৰ মাজত হোৱা সংঘর্ষত ৩২জন লোক নিহত হোৱাৰ লগতে ৩০জন আহত হৈছে৷ উল্লেখ্য যে বৃহস্পতিবাৰে যাত্রীবাহী বাহনত সন্ত্রাসবাদীয়ে জধে-মধে গুলীয়াই ৫০জন লোকক হত্যা কৰাৰ কেইঘণ্টামান পিছতেই জিলাখনৰ উক্ত অঞ্চল দুটাত সাম্প্রদায়িক সংঘর্ষ লাগে৷ দুয়োটা সম্প্রদায়ৰ লোকে হাতে হাতে গধুৰ আৰু স্বয়ংক্রিয় অস্ত্র লৈ মুখামুখিকৈ সংঘর্ষ লগাত দুয়োটা পক্ষৰ লোকৰ প্রাণহানি হয়৷ চৰকাৰী সূত্র মতে, নিহতৰ সংখ্যা বৃদ্ধি হ’বও পাৰে৷ এই সংঘর্ষৰ সময়ত দুয়োটা পক্ষৰ বাসগৃহ আৰু দোকানৰো ক্ষতিসাধন হৈছে৷ আনপিনে, একাংশ লোকে এই সাম্প্রদায়িক সংঘর্ষৰ বাবেই বাসগৃহ এৰি নিৰাপদ স্থানলৈ পলায়ন কৰিছে৷ পৰিস্থিতি জটিল হৈ পৰা বাবে অধিক নিৰাপত্তা বাহিনী মোতায়েন কৰা হৈছে৷ আনহাতে সকলো শৈক্ষিক প্রতিষ্ঠান বন্ধ কৰি দিয়া হৈছে৷ মন কৰিবলগীয়া যে পাকিস্তানত চিয়া আৰু চুন্নী মুছলমানৰ লগত সংঘাত দীর্ঘদিন ধৰি চলি আহিছে৷ বিগত কেইবাদিনো ধৰি প্রদেশখনত সন্ত্রাসবাদী কার্যকলাপ বৃদ্ধি পোৱাৰ পিছত জনজাতীয় সম্প্রদায়ৰ মাজত সাম্প্রদায়িক সংঘর্ষই অঞ্চলটোত উত্তেজনা বৃদ্ধি কৰিছে৷