নিয়মীয়া বাৰ্তা, ৩০ জানুৱাৰী : শোণিতপুৰৰ চাৰিদুৱাৰ আৰক্ষী থানাৰ অন্তৰ্গত সৰুপাটগাঁৱত সংঘটিত এক পথ দুৰ্ঘটনাত এজন লোক নিহত হোৱাৰ ঘটনাই অঞ্চলজুৰি শোকৰ ছাঁ পেলাইছে। ঘটনাৰ বিৱৰণী অনুসৰি, কালি সন্ধ্যা ৬:০০ মান বজাত দোকানৰ পৰা এজন লোক নিজা বাসগৃহলৈ বুলি ১৫নং ৰাষ্ট্ৰীয় ঘাইপথ পাৰ হ’ব ধৰোঁতেই তেজপুৰ দিশৰপৰা বালিপৰা দিশলৈ তীব্ৰগতিত আহি থকা এখন বলেৰ’ পিক আপ গাড়ীয়ে লোকজনক মহতিয়াই নিয়ে। ফলত লোকজন থিতাতে নিহত হয়। নিহত লোকজন সৰুপাট গাঁৱৰ বাসিন্দা দিলবাহাৰ গড় (৭০) বুলি জানিব পৰা গৈছে। আনহাতে, দুৰ্ঘটনাটো সংঘটিত কৰা গাড়ীখন ইতিমধ্যে চাৰিদু্ৱাৰ আৰক্ষীয়ে জব্দ কৰিবলৈ সক্ষম হৈছে। বাতৰি লিখাৰ সময়লৈকে গাড়ীখনৰ নম্বৰ জানিবলৈ সক্ষম হোৱা নাই।
প্ৰেৰক প্ৰাঞ্জল বৰা