প্রদেশ মহিলা কংগ্রেছৰ সভানেত্রী মীৰা বৰঠাকুৰ গোস্বামীৰ বিৰুদ্ধে মানহানি গোচৰ ৰুজু কৰিছে প্রাইড ইষ্ট এণ্টাৰটেইনমেণ্ট প্রাইভেট লিমিটেডৰ অধ্যক্ষ তথা পৰিচালন সঞ্চালক ৰিণিকি ভূঞা শর্মাই৷
উল্লেখ্য যে ডিব্রুগড়ত কংগ্রেছৰ এখন সভাত মীৰা বৰঠাকুৰ গোস্বামীয়ে ৰিণিকি ভূঞা শর্মাই মা কামাখ্যা দেৱালয় আৰু মহামৃত্যুঞ্জয় মন্দিৰৰ পৰা ধন সংগ্রহ কৰাৰ এক অভিযোগ উত্থাপন কৰিছিল৷ মীৰা বৰঠাকুৰ গোস্বামীৰ উক্ত মন্তব্যক লৈয়ে আদালতত ৰিণিকি ভূঞা শর্মাই অপৰাধমূলক মানহানিৰ এক গোচৰ ৰুজু কৰে৷
অহা ১৮ আগষ্টত গোচৰটোৰ শুনানিৰ দিন স্থিৰ কৰা হৈছে৷ উক্ত দিনা আদালতত উপস্থিত হ’ব লাগিব মীৰা বৰঠাকুৰ গোস্বামী৷
এই সন্দর্ভত ৰিণিকি ভূঞা শর্মাই সংবাদ মাধ্যমৰ আগত কয়– মহিলা কংগ্রেছৰ সভানেত্রী মীৰা বৰঠাকুৰ গোস্বামীয়ে অভিযোগ তুলিছিল যে মা কামাখ্যা দেৱালয় আৰু মহামৃত্যুঞ্জয় ধামৰ পৰা মই ধন সংগ্রহ কৰোঁ৷ মই ভাবোঁ, এয়া বৰ নিকৃষ্ট কথা৷ এগৰাকী মহিলা হৈ আন এগৰাকী মহিলাক এনেধৰণৰ মন্তব্য কৰাটো দুর্ভাগ্যজনক৷
ৰাজনৈতিক ক্ষেত্রত থকা হেতুকে তেওঁলোকে আমাৰ নাম লৈ বহু কথা কৈ থাকে৷ সেইবোৰৰ প্রতি মোৰ ক’বলগীয়া একো নাই৷ কিন্তু শেহতীয়াকৈ তেওঁ যি ভাষাৰে এই বক্তব্য প্রকাশ কৰিলে যে মই মা কামাখ্যা দেৱালয় আৰু মহামৃত্যুঞ্জয় ধামৰ পৰা ধন সংগ্রহ কৰোঁ, এয়া অতি নিকৃষ্ট ৰাজনৈতিক কথা৷ এই বক্তব্য অসমীয়া সমাজত কেতিয়াও গ্রহণযোগ্য নহয়৷
এগৰাকী অসমীয়া নাৰী হিচাপে এই বক্তব্যৰ বিৰুদ্ধে মই সেয়েহে আদালতৰ ওচৰ চাপিছোঁ৷ মই যদি এনেদৰে ধন সংগ্রহ কৰিছোঁ বুলি তেওঁ দাবী কৰে, তাক প্রমাণ কৰক৷ মীৰা বৰঠাকুৰ গোস্বামীৰ এই বক্তব্যৰ বাবে মই শেষ পর্যন্ত আদালতত যুঁজ দিম৷
Niyomiya Barta Desk, Date of published : 27 June, 2025