CP Radhakrishnan Nomination : এনডিএৰ উপ-ৰাষ্ট্ৰপতি পদৰ প্ৰাৰ্থী চি পি ৰাধাকৃষ্ণনে আজি মনোনয়ন দাখিল কৰিছে। মনোনয়নৰ সময়ত প্ৰধানমন্ত্ৰী নৰেন্দ্ৰ মোদী, কেন্দ্ৰীয় গৃহমন্ত্ৰী অমিত শ্বাহ, কেন্দ্ৰীয় মন্ত্ৰী নীতিন গাডকাৰিৰ লগতে কেইবাজনো সাংসদ উপস্থিত আছিল। উল্লেখযোগ্য যে প্ৰধানমন্ত্ৰী মোদী তেওঁৰ প্ৰস্তাৱক হিচাপেও কাৰ্যনিৰ্বাহ কৰিছে। ইণ্ডিয়া মিত্ৰজোটে উপ-ৰাষ্ট্ৰপতি নিৰ্বাচনৰ বাবে প্ৰাক্তন ন্যায়াধীশ বি সুদৰ্শন ৰেড্ডীক প্ৰাৰ্থী হিচাপে ঘোষণা কৰিছে। মজাৰ কথা যে এইবাৰ দুয়োজন প্ৰাৰ্থী দক্ষিণ ভাৰতৰ।
চি পি ৰাধাকৃষ্ণনে মনোনয়ন দাখিলৰ পূৰ্বে সংসদ পৰিসৰত থকা প্ৰেৰণা স্থলত গৈ শ্ৰদ্ধাঞ্জলি অৰ্পণ কৰে। প্ৰেৰণা স্থলত বিশিষ্ট ব্যক্তিসকলৰ প্ৰতিমূৰ্তি স্থাপন কৰা হৈছে। তেওঁ প্ৰথমে মহাত্মা গান্ধীৰ প্ৰতিমূৰ্তিৰ সন্মুখত নমন কৰে আৰু তাৰ পিছত সকলো বিশিষ্ট ব্যক্তিক শ্ৰদ্ধাঞ্জলি জ্ঞাপন কৰে।
চি পি ৰাধাকৃষ্ণনৰ জন্ম তামিলনাডুৰ তিৰুপুৰত। তেওঁ ১৯৭৪ চনত ভাৰতীয় জনসংঘৰ সৈতে তেওঁৰ ৰাজনৈতিক জীৱনৰ আৰম্ভণি কৰিছিল আৰু ৰাষ্ট্ৰীয় স্বয়ংসেৱক সংঘৰ সৈতেও জড়িত। তেওঁ কইম্বাটোৰৰ পৰা দুবাৰকৈ লোকসভাৰ সাংসদ নিৰ্বাচিত হৈছে। তেওঁ তামিলনাডু বিজেপিৰ সভাপতিৰ দায়িত্ব পালন কৰাৰ উপৰি ঝাৰখণ্ড আৰু তেলেংগানাৰ ৰাজ্যপাল হিচাপেও কাৰ্যনিৰ্বাহ কৰিছে। দক্ষিণ ভাৰতত বিজেপিক শক্তিশালী কৰাৰ বাবে তেওঁ যথেষ্ট কাম কৰিছে।
ইণ্ডিয়া মিত্ৰজোঁটে প্ৰাক্তন ন্যায়াধীশ বি সুদৰ্শন ৰেড্ডীক উপ-ৰাষ্ট্ৰপতি নিৰ্বাচনৰ প্ৰাৰ্থী হিচাপে মনোনীত কৰিছে। তেওঁ অন্ধ্ৰপ্ৰদেশ উচ্চ ন্যায়ালয়ত ন্যায়াধীশ হিচাপে কাৰ্যনিৰ্বাহ কৰিছে আৰু গুৱাহাটী উচ্চ ন্যায়ালয়ৰ মুখ্য ন্যায়াধীশৰ ভূমিকাও পালন কৰিছে। ২০০৭ৰ পৰা ২০১১লৈ তেওঁ ভাৰতৰ উচ্চতম ন্যায়ালয়ৰ ন্যায়াধীশ হিচাপে কাৰ্যনিৰ্বাহ কৰিছিল। এতিয়া ইণ্ডিয়া মিত্ৰজোঁটে তেওঁক উপ-ৰাষ্ট্ৰপতি নিৰ্বাচনৰ বাবে প্ৰাৰ্থী হিচাপে প্ৰতিদ্বন্দ্বিতাৰ বাবে নমাইছে।
উপ-ৰাষ্ট্ৰপতি নিৰ্বাচন ৯ ছেপ্টেম্বৰ, ২০২৫ তাৰিখে অনুষ্ঠিত হ’ব। এই নিৰ্বাচনক এখন আদৰ্শগত প্ৰতিযোগিতা হিচাপে দেখা হৈছে, য’ত দুয়োজন প্ৰাৰ্থীৰ দক্ষিণ ভাৰতৰ পটভূমিয়ে ইয়াক অধিক আকৰ্ষণীয় কৰি তুলিছে।
Niyomiya Barta desk, 20 August