গুৱাহাটী আজি বিশ্বজনীন উত্তেজনাত ভৰি পৰিছে, আৰু ইয়াৰ পিছত কেৱল খানাপাৰাত অনুষ্ঠিত হৈ যোৱা পোষ্ট মেলনৰ কনচাৰ্টৰ লগত সীমাবদ্ধ নহয়। সাংস্কৃতিক উচ্চাকাংক্ষা প্ৰদৰ্শন কৰি অসমে এটা সাহসী সিদ্ধান্ত লব গৈ আছে। মুখ্যমন্ত্ৰী ড০ হিমন্ত বিশ্ব শৰ্মাই ঘোষণা কৰিছে যে ৰাজ্য চৰকাৰে অহা দিনত আন্তঃৰাষ্ট্ৰীয় পপষ্টাৰ ছাকিৰাকো এক সংগীতানুষ্ঠানৰ বাবে আমন্ত্ৰণ জনাবলৈ পৰিকল্পনা কৰিছে।
আজি মুখ্যমন্ত্ৰীয়ে কয় যে বিশ্ব সংগীতৰ প্ৰতি অসমীয়াৰ বাঢ়ি থকা আগ্ৰহে চৰকাৰক নতুনকৈ ডাঙৰ পৰিকল্পনা কৰিবলৈ উৎসাহিত কৰিছে। তেওঁৰ ভাষ্য অনুসৰি— “পোষ্ট মেলনৰ পিছত আমি ছাকিৰাকো অসমলৈ আনি কনচাৰ্টৰ আয়োজন কৰিবলৈ চেষ্টা কৰিব।” তেওঁ আনকি উল্লেখ কৰে যে গুৱাহাটীৰ লগতে ডিব্ৰুগড় আৰু শিলচৰতো কিছুমান বিশ্বমানৰ শিল্পীৰ এনে বৃহৎ কনচাৰ্ট আয়োজন কৰিবলৈ আগ্ৰহ প্ৰদৰ্শন কৰিছে।
মুখ্যমন্ত্ৰীয়ে জনায় যে এই সকলো উদ্যোগ গুৱাহাটীলৈ বিশ্বমানৰ সংগীতানুষ্ঠান আকৰ্ষণ কৰাৰ এক বৃহৎ ভিজনৰ অংশ।
তেওঁ কয়— “আমি গুৱাহাটীক সংগীত কনচাৰ্টৰ হাব হিচাপে প্ৰতিষ্ঠা কৰিব বিচাৰো, আৰু এইখিনিৰ অংশ হিচাপে আজি পোষ্ট মেলনৰ কনচাৰ্ট অনুষ্ঠিত হল। গুৱাহাটীত প্ৰথমবাৰৰ বাবে এনে স্তৰৰ আন্তঃৰাষ্ট্ৰীয় শিল্পীৰ কনচাৰ্ট হোৱাটোৱেই নতুন দিশ উন্মোচন কৰিব বুলি মই বিশ্বাস কৰোঁ।”
বিৰোধী দলসহ কিছুমান মহলৰ সমালোচনাৰ উত্তৰ দি মুখ্যমন্ত্ৰীয়ে স্পষ্ট কৰে যে এনে বাধাই তেওঁৰ দৃঢ়তা আৰু সংকল্পক বৃদ্ধি কৰে। তেওঁৰ মতে, আন্তঃৰাষ্ট্ৰীয় সংগীত কনচাৰ্টসমূহ অসমত পৰ্যটন বৃদ্ধি কৰিব, অৰ্থনৈতিক সম্ভাৱনা বহু গুণে বিস্তৃত কৰিব আৰু ৰাজ্যখনত এটা শক্তিশালী কনচাৰ্ট-ভিত্তিক অৰ্থনীতি গঠন কৰিব।
ডিজিটেল ডেস্ক, ৮ ডিচেম্বৰ