ভোটাৰ তালিকা নির্বাচন আয়োগে প্রস্তুত কৰে, তাত বিজেপিৰ কোনো কমেণ্ট নাই : মুখ্যমন্ত্ৰী

খচৰা ভোটাৰ তালিকাত অসমৰ বাহিৰৰ লোকৰ নাম অন্তর্ভুক্ত হোৱা বুলি বিৰোধীয়ে কৰি অহা অভিযোগৰ প্রত্যুত্তৰ দিলে মুখ্যমন্ত্রী ড০ হিমন্ত বিশ্ব শর্মাই৷ মুখ্যমন্ত্রী ড০ শর্মাই সংবাদ মাধ্যমৰ আগত এই প্রসংগত কয়– ভোটাৰ তালিকা নির্বাচন আয়োগে প্রস্তুত কৰে, ইয়াত বিজেপিৰ কোনো কমেণ্ট নাই৷ বিজেপিয়ে এখন নিকা ভোটাৰ তালিকা হোৱাটো বিচাৰে৷ ক’ৰবাত যদি তালিকাত ভুল আছে, তাক নির্বাচন আয়োগে শুধৰাব লাগে৷

ভোটাৰ তালিকাৰ সম্পূর্ণ দায়িত্ব নির্বাচন আয়োগৰ, বিজেপিৰ কোনো কমেণ্ট নাই৷ বিৰোধীয়ে নির্বাচন আয়োগক দিয়া অভিযোগ প্রসংগতো মুখ্যমন্ত্রী ড০ শর্মাই কয়– আমিও অভিযোগ দিম, ২২ জানুৱাৰীলৈকে অভিযোগ দিয়াৰ সময় আছে৷

বহু ঠাইত আমাৰো অভিযোগ আছে৷ বহু মৃত লোকৰ নাম অন্তর্ভুক্ত হৈছে, বহিঃৰাজ্যত কাম কৰি থকা লোকৰ নামো অন্তর্ভুক্ত হৈ আছে৷ গতিকে, বিজেপিয়েও ভোটাৰ তালিকাৰ বিসংগতি দর্শাই ২২ জানুৱাৰীৰ আগতে অভিযোগ দিব৷

এয়া নির্বাচন আয়োগৰ ওপৰত অনাস্থা নহয়, এয়া নিয়মহে৷ ভোটাৰ তালিকাৰ খচৰাত ত্রুটি থাকিব পাৰে, গতিকে ইয়াক সংশোধন কৰিবৰ বাবে ওজৰ–দাবী থাকিব৷ প্র–পত্র ৬, ৭, ৮ পূৰণৰ জৰিয়তে সংশোধনৰ আবেদন কৰিব পাৰি৷ সংবাদ মাধ্যমৰ আগত অভিযোগ দিলেই ই শুদ্ধ নহয়, ইয়াৰ বাবে প্র–পত্র পূৰণ কৰি জমা দিব লাগিব৷ যদি কংগ্রেছৰ সমর্থকৰ নাম কর্তন হৈছে, তেওঁলোকে অভিযোগ দিয়ক৷ বিজেপিয়ে কর্তন কৰা বুলি ভাবিছে যদি তেওঁলোকে অভিযোগ দিয়ক৷

এয়া খোলা কিতাপৰ দৰে৷ নির্বাচন আয়োগত ৬, ৭, ৮নং প্র–পত্র পূৰণৰ জৰিয়তে অভিযোগ দিব পাৰে৷ এইক্ষেত্রত যদি নামৰো ভুল আছে, তেন্তে প্র–পত্র পূৰণ কৰি শুধৰাব পাৰিব৷

ইফালে, আগন্তুক বিধানসভা নির্বাচনত বিজেপিয়ে মহিলা প্রার্থীক অগ্রাধিকাৰ দিব বুলি ঘোষণা কৰি মুখমন্ত্রী ড০ শর্মাই কয়– কিমান শতাংশ মহিলাক প্রার্থিত্ব দিব, সেয়া প্রার্থিত্ব প্রদানৰ পাছতহে স্পষ্ট হ’ব৷ কিন্তু আমি যথেষ্টসংখ্যক মহিলাক প্রার্থিত্ব দিম৷ প্রধানমন্ত্রী নৰেন্দ্র মোদীয়ে বিচাৰে যে মহিলাই অগ্রাধিকাৰ পাব লাগে৷

জয়ৰ সম্ভাৱনা থকা সমষ্টিত মহিলাক অগ্রাধিকাৰ দিয়া হ’ব৷ যদি কোনো এটা সমষ্টিত ৫০ শতাংশ জয়ৰ সম্ভাৱনা এজন পুৰুষ আৰু ৫০ শতাংশ জয়ৰ সম্ভাৱনা এগৰাকী মহিলাৰ আছে, তেন্তে আমি মহিলা প্রার্থীক অগ্রাধিকাৰ দিম৷ যি সমষ্টিত জয়ৰ সম্ভাৱনা আছে, তাত মহিলাক অগ্রাধিকাৰ দিয়া হ’ব৷ য’ত জয়ৰ সম্ভাৱনা নাই, তাত মহিলাৰ পৰিৱর্তে পুৰুষ প্রার্থীয়ে অগ্রাধিকাৰ পাব৷

মুখ্যমন্ত্রী ড০ শর্মাই ইয়াকো স্পষ্ট কৰে যে ২০২৯ চনত হ’ব লগা লোকসভা নির্বাচনত ৩০ শতাংশ মহিলা প্রার্থী প্রক্ষেপ কৰা হ’ব৷ বিধানসভা নির্বাচনত বিজেপিৰ জয়ৰ সম্ভাৱনা সর্বাধিক বুলি শেহতীয়াকৈ প্রকাশ হোৱা এগজিট প’লক লৈও মুখ্যমন্ত্রীয়ে প্রতিক্রিয়া প্রকাশ কৰে৷

তেওঁ কয়– আজিৰ দিনত এগজিট প’লৰ আলোচনা কৰাৰ সময় হোৱা নাই৷ বিজেপি আৰু মিত্র দলে কিমানখন আসনত প্রতিদ্বন্দ্বিতা কৰিব, সেয়া স্পষ্ট নোহোৱাকৈ এগজিট প’লে দেখুৱাইছে যে বিজেপিয়ে কিমানখন আসনত জয় হ’ব৷

দৰাচলতে এগজিট প’লে প্রাৰম্ভিক ইংগিত এটাহে প্রদান কৰিছে যে বর্তমান ভোটাৰৰ অনুভৱ কি? মই ভাবোঁ যে আসন বুজাবুজিৰ পাছত ফেব্রুৱাৰী মাহত পৰিৱেশটো অধিক স্পষ্ট হ’ব৷ সেই সময়ত বিজেপিৰ ফালে সমর্থন আৰু বৃদ্ধি পাব৷ কাৰণ আমাৰ কামো হৈ আছে, আঁচনিও বাঢ়ি গৈ আছে, বিভিন্ন ধৰণৰ কাম কেন্দ্রীয় চৰকাৰেও কৰি আছে৷ ২০ ফেব্রুৱাৰী মানত আমি গম পাম যে বিজেপিয়ে কিমান আসন পাব৷ কিন্তু বর্তমান এগজিট প’লে যি দেখুৱাইছে, অতি কমসংখ্যক ছীট দেখুৱাইছে৷

ডিজিটেল ডেস্ক, ৬ জানুৱাৰী

লগতে এইটোও পঢ়ক— বাংলাদেশত আইপিএলৰ সম্প্রচাৰ নিষিদ্ধ, মুস্তাফিজুৰ ৰহমান বিতর্কৰ পিছত ঢাকাৰ কঠোৰ সিদ্ধান্ত