ডিজিটেল ডেস্ক, ২ মার্চ : আমেৰিকাত অনুষ্ঠিত হ’বলগীয়া ফিফা বিশ্বকাপ ফুটবলত ইৰানৰ অংশগ্রহণক লৈ জল্পনা–কল্পনাৰ সৃষ্টি হৈছে৷ ইৰানৰ ফুটবল এছ’চিয়েচনৰ মুৰব্বী মেহদি তাজীয়ে কয় যে বর্তমানৰ পৰিস্থিতিত ইৰানৰ বাবে আমেৰিকাত অনুষ্ঠিত হ’বলগীয়া বিশ্বকাপত খেলাৰ সম্ভাৱনা অতি কম৷ আমেৰিকা আৰু ইজৰাইলে যৌথভাৱে ইৰানক আক্রমণ কৰিছে৷ সর্বোচ্চ নেতা আলী খামেনেইৰ মৃত্যু হৈছে৷
ইৰানৰ ৰাষ্ট্রীয় নিয়ন্ত্রিত চেনেলত মেহদীয়ে কয় যে আমেৰিকাৰ আক্রমণৰ পিছত ইৰানৰ বাবে বিশ্বকাপত অংশগ্রহণ কৰাৰ সম্ভাৱনা অতি কম৷ অৱশ্যে এই সিদ্ধান্ত ক্রীড়া কর্তৃপক্ষই ল’ব৷ অহা ১১ জুনত আৰম্ভ হ’ব ফিফা বিশ্বকাপ ফুটবল৷ এছিয়ান অর্হতা পর্যায়ত গ্রুপ ‘এ’ৰ বিজয়ী হিচাপে ইৰানে বিশ্বকাপৰ টিকট নিশ্চিত কৰিছে৷ তেওঁলোকৰ তিনিওখন মেচ আমেৰিকাৰ মাটিত হ’ব৷ ১৫ আৰু ২১ জুনত ল’ছ এঞ্জেলছত ক্রমে নিউজিলেণ্ড আৰু বেলজিয়ামৰ বিৰুদ্ধে খেলিব৷ ২৬ জুনত ছিয়াটলত ইজিপ্তৰ বিৰুদ্ধে এখন খেল অনুষ্ঠিত হ’ব যদিও এই মুহূর্তত এই মেচখন অনুষ্ঠিত হোৱাৰ সম্ভাৱনা নাই৷
মন কৰিবলগীয়া যে যোৱা বছৰ বিশ্বকাপৰ সময়সূচী ঘোষণা হোৱাৰ পূর্বে ড’নাল্ড ট্ৰাম্পে ইৰানীসকলক আমেৰিকালৈ যোৱাত নিষেধাজ্ঞা আৰোপ কৰিছিল৷ এই সিদ্ধান্তৰ প্রতিবাদত ইৰানৰ বিষয়াসকলে সময়সূচী ঘোষণা অনুষ্ঠানত অংশগ্রহণ নকৰাৰ সিদ্ধান্ত লয়৷ প্রথম অৱস্থাত আমেৰিকাই তেওঁলোকক ভিছাও দিয়া নাছিল৷ বহু দ্বিধাবোধৰ অন্তত ভিছা দিয়া হ’ল আৰু ইৰানৰ বিষয়াসকলেও মন সলনি কৰি সূচী ঘোষণা অনুষ্ঠানত অংশগ্রহণ কৰিবলৈ আমেৰিকালৈ যায়৷ কিন্তু সেইটোৱে সম্পর্কটো শীতল কৰা নাছিল৷ এতিয়াৰ বাবে ফিফাই কয় যে তেওঁলোকে ইৰানৰ পৰিস্থিতি তীক্ষ্ণভাৱে নিৰীক্ষণ কৰি আছে৷ ফিফাৰ প্রধান সম্পাদক মাথিয়াছ গ্রাফষ্ট্রমে কয়- ‘ইৰানৰ পৰিস্থিতিৰ বিষয়ে আমি তথ্য লাভ কৰিছোঁ৷ এই সন্দর্ভত বৈঠক হৈছে৷ অৱশ্যে এতিয়াও বিতংভাৱে একো কোৱাৰ সময় হোৱা নাই৷ বিশ্বৰ বিভিন্ন সমস্যাৰ ওপৰত আমি চকু ৰাখিছোঁ৷ আমাৰ দায়িত্ব হৈছে যে সকলো দেশেই যাতে বিশ্বকাপত নিৰাপদে অংশগ্রহণ কৰিব পাৰে৷ আমি সকলো আয়োজক দেশৰ সৈতে নিয়মীয়াকৈ যোগাযোগত আছোঁ ৷’
ফিফাৰ নিয়ম অনুসৰি নাম প্রত্যাহাৰ কৰা গ্রুপৰ ৰানার্ছ আপ দল বা সংশ্লিষ্ট মহাদেশৰ সর্বোচ্চ ৰেংকিং দলে বিশ্বকাপৰ বাবে যোগ্যতা অর্জন নকৰা দলটোৱে প্রতিযোগিতাত খেলাৰ সুযোগ পাব৷ সেই অনুসৰি সংযুক্ত আৰব আমিৰশ্বাহীয়ে বিশ্বকাপ খেলিব পাৰিব৷ এছিয়াত সর্বোচ্চ ৰেংকিঙৰ দলসমূহে বিশ্বকাপত খেলিব পৰা নাই বা ইৰাকক সুযোগ দিয়া হ’ব পাৰে৷ মার্চ মাহত ইৰাকে আন্তঃমহাদেশীয় কোৱালিফায়াৰত বলিভিয়া বা চুৰিনামৰ বিৰুদ্ধে খেলিব৷ ফিফাই ইৰাকক বিশ্বকাপত পোনপটীয়াকৈ প্রৱেশৰ সুবিধা দিব পাৰে৷ তেনে ক্ষেত্রত এমিৰেটছে আন্তঃমহাদেশীয় কোৱালিফায়াৰত খেলিব লাগিব৷