এক বিশাল শক্তি প্ৰদৰ্শনেৰে বিজেপিৰ জ্যেষ্ঠ নেতা তথা ৰাজ্যিক শক্তিমন্ত্ৰী প্ৰশান্ত ফুকনে আজি ডিব্ৰুগড় বিধানসভা সমষ্টিৰ বাবে আনুষ্ঠানিকভাৱে মনোনয়ন পত্ৰ দাখিল কৰে। ধাৰাবাহিকভাৱে পঞ্চমবাৰৰ বাবে ঐতিহাসিক বিজয়ৰ লক্ষ্যৰে ৭১ বছৰীয়া অভিজ্ঞ ৰাজনীতিবিদগৰাকীয়ে শ শ দলীয় কৰ্মী আৰু উৎসাহী সমৰ্থকৰ সৈতে এক বিশাল শোভাযাত্ৰা উলিয়াই ডিব্ৰুগড়ৰ ৰাজপথ একপ্ৰকাৰ গেৰুৱাময় কৰি তোলে।
বিজেপিৰ পতাকা আৰু আকাশ-বতাহ কঁপাই তোলা শ্লোগানেৰে মুখৰিত এই পদযাত্ৰা পুৰণি হাইস্কুল খেলপথাৰৰ পৰা আৰম্ভ হৈ ডিব্ৰুগড় জিলা আয়ুক্তৰ কাৰ্যালয়ত সমাপ্ত হয়। ফুকনৰ ৰাজনৈতিক যাত্ৰা উজনি অসমত বিজেপিৰ ক্ৰমবৰ্ধমান জনপ্ৰিয়তাৰ এক অনন্য নিদৰ্শন বুলিও অভিহিত কৰিব পাৰি। প্ৰশান্ত ফুকন আছিল কংগ্ৰেছৰ দুৰ্গ হিচাপে পৰিচিত মৰ্যাদাপূৰ্ণ ডিব্ৰুগড়ৰ আসনখন দখল কৰা গেৰুৱা দলৰ প্ৰথমজন প্ৰাৰ্থী।
২০০৬ চনত তেওঁৰ বিজয় আছিল অতি চমৎকাৰী, য’ত সেই সময়ৰ কংগ্ৰেছ বিধায়ক ড° কল্যাণ কুমাৰ গগৈ মাত্ৰ ১৭৫টা ভোটৰ ব্যৱধানত পৰাজিত হৈছিল। সেই নিৰ্বাচনত ফুকনে ২৮,৪২৪টা ভোট লাভ কৰাৰ বিপৰীতে গগৈয়ে লাভ কৰিছিল ২৮,২৪৯টা ভোট।
সেই প্ৰথম বিজয়ৰ পিছৰে পৰা প্ৰতিটো নিৰ্বাচনতে ফুকনৰ জনপ্ৰিয়তা ক্ৰমাৎ বৃদ্ধি পাই আহিছে। ২০১১ চনত তেওঁ পুনৰ কংগ্ৰেছৰ ড° গগৈৰ সৈতে প্ৰতিদ্বন্দ্বিতাৰ মুখামুখি হয়, কিন্তু এইবাৰ বিজয়ৰ ব্যৱধান ১৯,৬০৯টা ভোটলৈ বৃদ্ধি পায়। ফুকনে ৪৬,৫০৬টা ভোট লাভ কৰাৰ বিপৰীতে কংগ্ৰেছ নেতাগৰাকীয়ে ২৬,৮৯৭টা ভোট লাভ কৰিবলৈ সক্ষম হয়।
সেইদৰে ২০১৬ চনৰ নিৰ্বাচনী ঢৌত ফুকনে নিজৰ স্থিতি অধিক শক্তিশালী কৰি কংগ্ৰেছ প্ৰাৰ্থী চন্দ্ৰকান্ত বৰুৱাক ২৭,৩৭৪টা ভোটৰ ব্যৱধানত পৰাস্ত কৰে। ফুকনে ৬৩,৯৮৫টা ভোট লাভ কৰাৰ বিপৰীতে বৰুৱাই পাইছিল ৩৬,৬১১টা ভোট।
বিজয়ৰ এই ধাৰা ২০২১ চনতো অব্যাহত থাকে, য’ত তেওঁ কংগ্ৰেছ প্ৰাৰ্থী ৰাজকুমাৰ নীলনেত্ৰ নেওগৰ বিৰুদ্ধে এতিয়ালৈকে সৰ্বাধিক ৩৮,০০৫টা ভোটৰ ব্যৱধানত জয়লাভ কৰে। সেই প্ৰতিযোগিতাত ফুকনে ৬৮,৭৬২টা ভোট লাভ কৰিছিল আৰু নেওগে পাইছিল ৩০,৭৫৭ টা ভোট।
আজি মনোনয়ন দাখিলৰ আনুষ্ঠানিক প্ৰক্ৰিয়া সমাপ্ত কৰি জিলা আয়ুক্ত কাৰ্যালয়ৰ পৰা ওলাই আহি ফুকনে দৃঢ়তাৰে কয়- “ডিব্ৰুগড়বাসীৰ পৰা আজি মই যি মৰম আৰু সমৰ্থন লাভ কৰিছোঁ সেয়া অভূতপূৰ্ব। বৰ্তমানৰ বাস্তৱ পৰিস্থিতি আৰু আমাৰ চৰকাৰে কৰা কামসমূহলৈ চাই মই নিশ্চিত যে এইবাৰ মই অধিক ভোটৰ ব্যৱধানত জয়ী হ’ম।”
বিশেষ বাৰ্তা, ডিব্ৰুগড়, ২০ মাৰ্চ :