মধ্যপ্রাচ্যৰ সংকট ট্রাম্পৰ সৃষ্টি, আমেৰিকাৰ ৰাষ্ট্রপতিকেই কাঠগৰাত তুলিলে প্রাক্তন মার্কিন বিষয়াই

ডিজিটেল ডেস্ক, ২৪ মার্চ : ইৰান যুদ্ধক লৈ আমেৰিকাৰ ৰাষ্ট্রপতি ড’নাল্ড ট্রাম্পকেই কাঠগৰাত তুলিলে মার্কিন চোৰাংচোৱা সংস্থা চিআইএৰ প্রাক্তন বিষয়া লিঅ’ন পেনেটাই৷ তেওঁ জনাই দিয়ে যে ইৰান যুদ্ধৰ বাবে দায়ী মার্কিন ৰাষ্ট্রপতিগৰাকী৷ বর্তমান তেওঁ একাষৰীয়া হৈ পৰিছে৷ তেওঁৰ মতে, ট্রাম্প এতিয়া এনে এক অৱস্থাৰ মাজত সোমাই পৰিছে য’ত তেওঁ লোৱা যিকোনো সিদ্ধান্ত ৰাজনৈতিক বা কৌশলগত সমস্যাৰ মুুখত পৰিব পাৰে৷

সংবাদ মাধ্যমক দিয়া এটা সাক্ষাৎকাৰত তেওঁ কয়- ‘মধ্যপ্রাচ্যৰ এই সংকট ট্রাম্পৰ সৃষ্টি৷ এয়া একো অপ্রত্যাশিত নহয়৷’ মার্কিন নিৰাপত্তা বিষয়াগৰাকীয়ে জনায়- ‘ইৰানে বছৰৰ পিছত বছৰ ধৰি হৰমুজ প্রণালী অৱৰুদ্ধ কৰিলে বিশ্বত তেল সৰবৰাহ ব্যাহত হ’ব পাৰে৷ অতীতত বাৰে বাৰে সতর্ক কৰা সত্ত্বেও বিষয়টোক উপেক্ষা কৰা হয়৷ ইৰানৰ সৈতে যুদ্ধত জড়িত হৈ পৰিলে প্রধান সংকটৰ স্থান হ’ল হৰমুজ প্রণালী৷ ইয়াত কোনো জটিল বিজ্ঞান নাই৷’

বর্তমানৰ পৰিস্থিতিত তেওঁ আমেৰিকাৰ ‘প্রস্তুতিৰ অভাৱ’ বুলি ব্যাখ্যা কৰে৷ লিঅ’নে দাবী কৰে যে মার্কিন প্রশাসনে হয় ইৰানক অৱমূল্যায়ন কৰিছে অথবা তেওঁলোকে ধৰি লৈছে যে এই সংঘাত শীঘ্রেই শেষ হৈ যাব৷ তেওঁ কয়- ‘মার্কিন প্রশাসনেই এই পৰিস্থিতিৰ বাবেই প্রস্তুত নাছিল৷ এই সংঘাতৰ প্রভাৱ বর্তমান কেৱল মধ্যপ্রাচ্যতে নহয়, বৰং সমগ্র বিশ্বতে অনুভূত হৈছে৷’

উল্লেখযোগ্য যে সোমবাৰে ২৪ দিনত ভৰি দিছে ইৰান যুদ্ধই৷ এই যুদ্ধত ইৰান ছাৰখাৰ হৈ গ’লেও প্রত্যাক্রমণত আমেৰিকাৰো ক্ষয়–ক্ষতি কম হোৱা নাই৷ মধ্যপ্রাচ্যত সিঁচৰতি হৈ থকা একাধিক মার্কিন ধাতু ক্ষত–বিক্ষত হৈ পৰিছে প্রত্যাক্রমণত৷ যোৱা ২০ দিনৰ যুদ্ধত এই পর্যন্ত তিনিখন মার্কিন এফ–৩৫ যুদ্ধ বিমান আৰু ৬খন কে চি টেংকাৰ ধ্বংস হৈছে৷ ইজৰাইলৰ হাইফা তেল শোধনাগাৰৰ লগতে মধ্যপ্রাচ্যৰ একাধিক তেল আৰু গেছ ভাণ্ডাৰ ধ্বংস কৰিছে ইৰানে৷