এটি কণমানি শিশুৰ জন্মদিনৰ আনন্দই কেনেকৈ এক বিশাল পৰিৱেশ আন্দোলনৰ প্ৰথমটো অধ্যায় ৰচনা কৰিব পাৰে, আজি তাৰেই এক অনন্য নিদৰ্শনৰ সাক্ষী হ’ল অসমৰ টোপাতলী। ডিমৰীয়া বিধানসভা সমষ্টিৰ অন্তৰ্গত সোণাপুৰৰ টোপাতলিত এক দৃষ্টিনন্দন দৃশ্যৰ অৱতাৰণা হয়, য’ত নিজৰ দ্বিতীয়টো জন্মদিন উদযাপন কৰি কণমানি ভাস্বিকা তালুকদাৰে বন মন্ত্ৰী জয়ন্ত মল্লবৰুৱাৰ সৈতে এটা গছপুলি ৰোপণ কৰে। ইয়াৰ লগে লগে ৰাজ্যখনত আনুষ্ঠানিকভাৱে আৰম্ভ হয় এক ব্যতিক্ৰমী আঁচনি – ‘জন্মদিন সেউজ শপত উদ্যান’।
অসম চৰকাৰৰ পৰিৱেশ, বন আৰু জলবায়ু পৰিৱৰ্তন বিভাগৰ মন্ত্ৰী জয়ন্ত মল্লবৰুৱাই উদ্বোধন কৰা এই কাৰ্যসূচী হৈছে ৰাজ্যখনৰ ইতিহাসত এনেধৰণৰ প্ৰথমটো অভিনৱ পদক্ষেপ। মানুহৰ জীৱনৰ আটাইতকৈ বিশেষ দিন অৰ্থাৎ ‘জন্মদিন’টোক কেৱল ক্ষণস্থায়ী উদযাপনৰ মাজতে আৱদ্ধ নাৰাখি, প্ৰকৃতি সুৰক্ষাৰ এক চিৰস্থায়ী দায়িত্বলৈ ৰূপান্তৰ কৰাই হৈছে এই আঁচনিৰ মূল লক্ষ্য।
বিভাগীয় পৰিকল্পনা অনুসৰি, অসমৰ ১২৬টা বিধানসভা সমষ্টিৰ প্ৰতিটোতে একোখনকৈ ‘জন্মদিন সেউজ শপত উদ্যান’ গঢ়ি তোলা হ’ব। এই উদ্যানসমূহ কেৱল সাধাৰণ ৰাজহুৱা স্থান হৈ নাথাকি, পৰিণত হ’ব একো একোখন ‘আৱেগৰ বাগিচা’লৈ। য’ত নাগৰিকসকলে নিজৰ বা প্ৰিয়জনৰ জন্মদিনত গছপুলি ৰোপণ কৰি প্ৰকৃতিৰ বুকুত নিজৰ অস্তিত্বৰ এক স্থায়ী সেউজ স্বাক্ষৰ এৰি থৈ যাব পাৰিব। ই ৰাজ্যখনৰ বনাঞ্চল বৃদ্ধিত অৰিহণা যোগোৱাৰ লগতে মানুহ আৰু প্ৰকৃতিৰ মাজত এক আজীৱন আত্মীয় সম্পৰ্ক গঢ়ি তুলিব।
উদ্বোধনী অনুষ্ঠানত উপস্থিত ৰাইজক সম্বোধন কৰি মন্ত্ৰী বৰুৱাই কয় যে পৰিৱেশ সংৰক্ষণৰ এই সমগ্ৰ প্ৰক্ৰিয়াটোক চৰকাৰী পৰিসীমাৰ পৰা উলিয়াই আনি জনসাধাৰণৰ ব্যক্তিগত অনুভৱৰ সৈতে সাঙুৰি দিয়াৰ বাবেই এই অনন্য আঁচনিৰ জন্ম হৈছে।
এই আঁচনিৰ আৱেগিক গুৰুত্বৰ ওপৰত আলোকপাত কৰি মন্ত্ৰীগৰাকীয়ে প্ৰকাশ কৰে – “বন বিভাগে ধাৰাবাহিকভাৱে বৃক্ষৰোপণ কৰি আহিছে যদিও, যেতিয়ালৈকে ইয়াৰ সৈতে সাধাৰণ মানুহৰ হৃদয় জড়িত নহয়, তেতিয়ালৈকে কোনো আন্দোলনে পূৰ্ণতা নাপায়। জন্মদিনত ৰোপণ কৰা এজোপা গছৰ সৈতে মানুহৰ শৈশৱ, কৈশোৰ আৰু যৌৱনৰ বহু হেঁপাহ, স্মৃতি আৰু আৱেগ জড়িত হৈ থাকে। সময়ৰ সোঁতত মানুহজন বাঢ়ি অহাৰ দৰেই গছজোপাও বাঢ়ি আহে আৰু ই প্ৰকৃতিৰ প্ৰতি থকা দায়িত্ববোধক আৰু অধিক কটকটীয়া কৰে।”
প্ৰথমখন উদ্যান ডিমৰীয়া সমষ্টিত স্থাপন কৰাৰ কথা উল্লেখ কৰি মন্ত্ৰীগৰাকীয়ে জনায় যে অতি সোনকালে পৰ্যায়ক্ৰমে সকলো সমষ্টিতে ইয়াৰ অনুৰূপ উদ্যান গঢ়ি তোলা হ’ব। জনসাধাৰণে যাতে সহজতে এই উদ্যানসমূহলৈ যাব পাৰে, তাৰ বাবে স্থানীয় বিধায়কসকলৰ সৈতে আলোচনা কৰি একোটা সুবিধাজনক স্থান বাছনি কৰা হ’ব।
মন্ত্ৰীগৰাকীয়ে লগতে কয় যে, এই আঁচনিৰ আটাইতকৈ আকৰ্ষণীয় দিশটো হ’ল – নাগৰিকসকলে নিজৰ জন্মদিনত এই উদ্যানসমূহলৈ আহি গছপুলি ৰোপণ কৰাৰ লগতে প্ৰকৃতি সংৰক্ষণৰ শপত গ্ৰহণ কৰিব। ৰোপণ কৰা প্ৰতিটো গছৰ নিয়মীয়া প্ৰতিপালন আৰু সংৰক্ষণৰ সম্পূৰ্ণ দায়িত্ব বন বিভাগে গ্ৰহণ কৰিব।
ফলত, বছৰ বছৰ পিছত নিজৰ জন্মদিনত যেতিয়া কোনো ব্যক্তিয়ে পুনৰ সেই উদ্যানখনলৈ আহি নিজৰ হাতৰে ৰোৱা গছজোপা ডাঙৰ-দীঘল হৈ উঠা দেখিব, তেতিয়া সেই গছজোপাৰ সৈতে গঢ়ি উঠা আৱেগিক সম্পৰ্কই তেওঁক আৰু তেওঁৰ পৰিয়ালক প্ৰকৃতি সংৰক্ষণৰ প্ৰতি অধিক দায়বদ্ধ কৰি তুলিব। এই আত্মিক বন্ধনেই শেষ পৰ্যন্ত প্ৰতিটো পৰিয়ালক অসমৰ সেউজ ঐতিহ্য সংৰক্ষণৰ একোজন সক্ৰিয় প্ৰহৰী হিচাপে গঢ়ি তুলিব।
এই শুভক্ষণত অঞ্চলটোৰ কেইবাগৰাকীও জ্যেষ্ঠ তথা কনিষ্ঠ নাগৰিকে নিজৰ জন্মদিন উপলক্ষে গছপুলি ৰোপণ কৰি এই যাত্ৰাত সক্ৰিয় অংশগ্ৰহণ কৰে। বিশেষকৈ কণমানি ভাস্বিকা তালুকদাৰৰ হাতেৰে ৰোপণ কৰা জন্মদিনৰ গছপুলিয়ে এই উদ্যোগৰ মূল বাৰ্তাক – “স্মৃতিৰ সৈতে সেউজীয়া, জন্মদিনৰ সৈতে দায়বদ্ধতা” – সুন্দৰভাৱে প্ৰতিফলিত কৰে।
‘জন্মদিন সেউজ শপত উদ্যান’ কেৱল এটি চৰকাৰী কাৰ্যসূচী হৈ থকা নাই, ই এতিয়া পৰিণত হৈছে এক গণ আন্দোলনলৈ। য’ত প্ৰতিজন অসমবাসীৰ জন্মদিন অনাগত প্ৰজন্মৰ বাবে এক জীৱন্ত আৰু সেউজ উপহাৰ থৈ যোৱাৰ এক মহৎ সুযোগ হৈ পৰিব।
ডিজিটেল ডেস্ক, ৮ জুলাই