নিয়মীয়া বাৰ্তা, ১৯ এপ্রিলঃ দুবাৰৰ বিশ্বকাপ বিজয়ী টীম ইণ্ডিয়াৰ প্রাক্তন অধিনায়ক মহেন্দ্র সিং ধোনীক বিশ্বৰ সর্বকালৰ শ্রেষ্ঠ অধিনায়ক আখ্যা দিছে ইংলেণ্ডৰ প্রাক্তন ক্রিকেটাৰ কেভিন পিটাৰছেনে ৷ ষ্টাৰ স্প’ৰ্টছৰ এক অনুষ্ঠানত একালৰ ষ্টাইলিছ মিডল অর্ডাৰ বেটছমেনগৰাকীয়ে কয় যে ধোনী নিঃসন্দেহে বিশ্ব ক্রিকেটৰ সর্বকালৰ শ্রেষ্ঠ অধিনায়ক ৷ তেওঁৰ মহানতাৰ বিৰুদ্ধে যুক্তি দর্শোৱাটো অত্যন্ত কঠিন কাম ৷ ‘আন্তঃৰাষ্ট্রীয় ক্রিকেটত মহেন্দ্র সিং ধোনীয়ে সফলতাৰ উচ্চ শিখৰ স্পর্শ কৰিছে৷ তেওঁৰ মহানতাৰ বিৰুদ্ধে যুক্তি প্রদর্শন কৰাটো একপ্রকাৰ অসম্ভৱ৷ তেওঁ ভাৰতীয় দলক আৰু চেন্নাই ছুপাৰ কিংছক যিদৰে নেতৃত্ব দিছিল, সেয়া প্রকৃতার্থত অতুলনীয়৷’ ইংলেণ্ডৰ হৈ ১০৪খন টেষ্ট খেলা পিটাৰছেনে এইদৰে কয়৷ মন কৰিবলগীয়া যে টীম ইণ্ডিয়াই মহেন্দ্র সিং ধোনীৰ নেতৃত্বত চমকপ্রদ সাফল্য অর্জন কৰিবলৈ সক্ষম হৈছিল৷ তেওঁৰ নেতৃত্বত ভাৰতে ২০০৭ৰ আই চি চি টি–২০ বিশ্বকাপ আৰু ২০১১ৰ এদিনীয়া বিশ্বকাপ জয় কৰাৰ লগতে ২০১৩ত আই চি চি চেম্পিয়নছ ট্রফীত খিতাপ অর্জন কৰিছিল৷ আইচিচিৰ আটাইকেইটা আগশাৰীৰ ট্রফী জয় কৰা ধোনী হ’ল বিশ্বৰ একমাত্র অধিনায়ক৷ বিগত বর্ষৰ এদিনীয়া বিশ্বকাপৰ ছেমিফাইনেলতে ভাৰতৰ হৈ অন্তিমখন আন্তঃৰাষ্ট্রীয় মেচ খেলা প্রাক্তন অধিনায়কগৰাকীয়ে চেন্নাই ছুপাৰ কিংছৰ হৈ আই পি এলতো ঈর্ষণীয় সাফল্য লাভ কৰিবলৈ সক্ষম হৈছিল৷ ঝাৰখণ্ডৰ তাৰকা উইকেটৰক্ষকগৰাকীৰ্ নেতৃত্বতে চেন্নাই ছুপাৰ কিংছে তিনিবাৰকৈ আই পি এলৰ খিতাপ জয় কৰিছিল৷ অৱশ্যে দীর্ঘদিন ধৰি ক্রিকেটৰ পৰা আঁতৰি থকাৰ পিছত ধোনীৰ কেৰিয়াৰ সম্প্রতি অনিশ্চিত হৈ পৰিছে ৷