নিয়মীয়া বাৰ্তা, ২৬ এপ্রিলঃ ইমৰান খান, ৱাছিম আক্রাম আৰু ৱাকাৰ ইউনিছৰ দৰে দুর্ধর্ষ বেগী বলাৰৰ বিৰুদ্ধে কেৰিয়াৰৰ প্রথমখন টেষ্টত মই একো উৱাদিহ ধৰিব পৰা নাছিলোঁ৷ ইমৰান, ৱাকাৰ আৰু আক্রামৰ তীব্রবেগী বাউন্সাৰৰ সন্মুখীন হোৱাটো মোৰ বাবে একেবাৰে নতুন অভিজ্ঞতা আছিল৷ তেওঁলোকৰ গতি আৰু বাউন্সাৰৰ দ্বাৰা মই কেইবাবাৰো অস্বস্তিত পৰিছিলোঁ আৰু ১৫ ৰান কৰি আউট হোৱাৰ সময়ত ভাবিছিলোঁ যে মোৰ বাবে এয়াই অন্তিম মেচ হ’ব৷ বর্ণিল টেষ্ট কেৰিয়াৰৰ আৰম্ভণিৰ সময়ছোৱাৰ স্মৃতি সোঁৱৰণ কৰি শনিবাৰে এইদৰে কয় শচীন তেণ্ডুলকাৰে৷ ইংলেণ্ডৰ প্রাক্তন ক্রিকেটাৰ নাছিৰ হুছেইনৰ সৈতে স্কাই স্পর্টছৰ এক অনুষ্ঠানত তেওঁ এই কথা অকপটে স্বীকাৰ কৰে৷