নিয়মীয়া বাৰ্তা, ২৯ মেঃ অষ্ট্রেলিয়াত অহা অক্টোবৰ–নৱেম্বৰ মাহত হ’বলগীয়া আইচিচি টি–২০ বিশ্বকাপ ক্রিকেট প্রতিযোগিতাখনৰ সন্দর্ভত অহা ১০ জুনত চূড়ান্ত সিদ্ধান্ত গ্রহণ কৰা হ’ব৷ আইচিচিৰ সন্মানীয় প্রতিযোগিতাখনৰ নির্ধাৰিত সূচীমতে আয়োজনৰ সন্দর্ভত বিশ্ব ক্রিকেটৰ সর্বোচ্চ সংস্থাটোৰ আজি অনুষ্ঠিত বৈঠকত আলোচনা হোৱাৰ কথা আছিল যদিও এই গুৰুত্বপূর্ণ বিষয়টোৰ সিদ্ধান্ত লোৱাৰ বাবে ১০ জুনলৈ পিছুৱাই দিয়ে আইচিচিয়ে৷ টেলি–কনফাৰেঞ্চৰ জৰিয়তে হোৱা বৈঠকত আগভাগ লোৱা আইচিচিৰ অধ্যক্ষ শশাংক মনোহৰে কয় যে গোপনীয়তাৰ স্বার্থত টি–২০ বিশ্বকাপ ক্রিকেট প্রতিযোগিতাখনৰ লগতে আন বিষয়সমূহৰ ওপৰত ল’বলগীয়া সকলোবোৰ সিদ্ধান্ত ১০ জুনলৈ পিছুৱাই দিয়া হয়৷
আইচিচিৰ আজি এই বৈঠকখনলৈ সকলোৱে অধীৰ আগ্রহেৰে বাট চাইছিল৷ কিয়নো আজিৰ এই বৈঠকখনতে অষ্ট্রেলিয়াত হ’বলগীয়া আগন্তুক টি–২০ বিশ্বকাপখনৰ আয়োজনৰ সন্দর্ভত চূড়ান্ত সিদ্ধান্ত গ্রহণৰ কথা আছিল৷ মহামাৰী ক’ৰোনা ভাইৰাছৰ ভয়াৱহতাৰ বাবে অষ্ট্রেলিয়াত হ’বলগীয়া আইচিচিৰ সন্মানীয় প্রতিযোগিতাখন আয়োজনক লৈ অনিশ্চয়তা আহি পৰিছে৷ ইফালে, বিশ্ব ক্রিকেটৰ সর্বোচ্চ সংস্থাটোৰ এই গুৰুত্বপূর্ণ বৈঠকখনত ২০২১ চনত ভাৰতত হ’বলগীয়া টি–২০ বিশ্বকাপখনৰ বাবে বিচিচিআয়ে এতিয়ালৈকে পৰিশোধ নকৰা কৰ সন্দর্ভতো আলোচনা হোৱাৰ পূর্ণ সম্ভাৱনা আছিল৷ মন কৰিবলগীয়া যে নির্ধাৰিত সময়ত ভাৰতে টি–২০ বিশ্বকাপখনৰ বাবে কৰ পৰিশোধ নকৰাত আইচিচিয়ে ভাৰতৰ পৰা বিশ্বকাপখনৰ আয়োজনৰ স্বত্বও কাঢ়ি নিব বুলি সকীয়নি দিছিল৷ ইফালে, মহামাৰী ক’ৰোনা ভাইৰাছৰ ভয়াৱহতাৰ বাবে যোৱা মার্চ মাহৰ মাজভাগৰ পৰা সম্পূর্ণৰূপে বন্ধ হৈ থকা ক্রিকেট প্রতিযোগিতাসমূহ পুনৰ আয়োজন কৰাৰ সন্দর্ভতো আইচিচিৰ বৈঠকখনত আলোচনা হোৱাৰ কথা আছিল৷