নিয়মীয়া বাৰ্ত ৫ জুনঃ নগাঁও জিলাৰ চামগুৰি আৰক্ষী থানাৰ অন্তৰ্গত আমনি অঞ্চলৰ এটা পুখুৰীত এজন যুৱকৰ মৃতদেহ উদ্ধাৰ হোৱা ঘটনাই অঞ্চলটোতে শোকৰ ছাঁ পেলাইছে ।।ঘটনা সন্দৰ্ভত জানিব পৰা মতে চামগুৰি আৰক্ষী থানাৰ অন্তৰ্গত আমনি অঞ্চলৰ হাগ্ৰাপুলিৰ নিবাসী ওৱান পাঁচালী নামৰ লোকজনৰ পুত্ৰ মন্টু পাঁচালী (১৫)নামৰ যুৱক জন যোৱা কালি দুপৰীয়া সময়ত ঘৰৰ পৰা ওলাই যোৱাৰ পিছৰ পৰা সন্ধানহীন হৈ আছিল ।পৰৱৰ্তী সময়ত পৰিয়ালৰ লোকে উক্ত যুৱক জনক বিচাৰ খোছাৰ কৰি নোপোৱাত কালি নিশা চামগুৰি আৰক্ষী থানাত এখন এজাহাৰ দাখিল কৰে৷পৰৱৰ্তী সময়ত চামগুৰি আৰক্ষীয়ে যুৱক জনৰ সন্ধানত তদন্ত আৰম্ভ কৰে যদিও উক্ত যুৱক জনৰ নিজৰ ঘৰৰ পিছফালে থকা পুখুৰীটোত পৰা বুলি সন্দেহ কৰে৷আনহাতে আজি আৰক্ষীয়ে তেজপুৰৰ পৰা এটা ডুবাৰু দল আনি উক্ত পুখুৰীটোত অভিযান চলাই যুৱক জনৰ মৃতদেহটো উদ্ধাৰ কৰিবলৈ সক্ষম হয় ।আনহাতে মন্টু পাচাঁলী নামৰ যুৱক জনে পুখুৰীত কেঁকোৰা ধৰিবলৈ যাওঁতে এনে ঘটনা সংঘটিত হবলৈ পালে বুলি আৰক্ষী আৰু পৰিয়ালৰ লোকে সন্দেহ প্ৰকাশ কৰিছে যদিও যুৱক জনৰ মৃতদেহটো মৰণোত্তৰ পৰীক্ষাৰ বাবে নগাঁও অসামৰিক চিকিৎসালয়লৈ প্ৰেৰণ কৰিছে বুলি জানিব পৰা গৈছে ৷