ক’ৰোনা যুদ্ধৰ মাজতে হঠাৎ অসুস্থ স্বাস্থ্যমন্ত্রী

নিয়মীয়া বাৰ্তা ১৫ জুনঃ ক’ভিড–১৯ৰ বিৰুদ্ধে চলি থকা সংগ্রামত দিন–ৰাতি একাকাৰ কৰা স্বাস্থ্যমন্ত্রী ড০ হিমন্ত বিশ্ব শর্মা দেওবাৰে সামান্যভাৱে অসুস্থ হৈ পৰে৷ ব্যস্ত কার্যসূচীৰ মাজতে দেওবাৰে পেটৰ বিষ অনুভৱ কৰাত ততালিকে মন্ত্রীগৰাকীয়ে গুৱাহাটী চিকিৎসা মহাবিদ্যালয় হাস্পতাল (জিএমচিএইচ)লৈ গৈ আল্ট্রাছ’ন’গ্রাফী কৰে৷ আল্টাছ’ন’গ্রাফীৰ ৰিপ’টত মন্ত্রীগৰাকীৰ কিডনীত ৩.৭৬ মিলিমিটাৰ জোখৰ এটা ষ্ট’ন ধৰা পৰে৷ এই সন্দর্ভত জিএমচিএইচৰ অধীক্ষক অভিজিৎ শর্মাই জানিবলৈ দিয়া মতে, এনএইচএমৰ কার্যালয়ত এক ভিডিঅ কনফাৰেঞ্চত ব্যস্ত থকাৰ সময়তে পেটৰ বিষ অনুভৱ কৰাৰ পিছত জিএমচিএইচলৈ তেওঁক পৰীক্ষাৰ বাবে অনা হয়৷ ইউৰ’লজী বিভাগৰ চিকিৎসকে পৰীক্ষা কৰাৰ পিছত তেওঁৰ এই ষ্ট’নটো ধৰা পৰে৷ অৱশ্যে গুৰুতৰ নোহোৱা হেতুকে তেওঁক বিষ উপশমৰ বেজী দিয়াৰ লগতে এটা চেলাইনো দিয়া হয়৷ চিকিৎসকে তেওঁক কিছুদিন ঘৰতে বিশ্রামৰ পৰামর্শ দিছে৷

উল্লেখ্য যে ৰাজ্যত ক’ৰোনা প্রতিৰোধৰ যুঁজত প্রতিদিনে ১৮–২০ ঘণ্টাকৈ কর্মৰত হৈ সন্মুখৰ পৰা নেতৃত্ব দি থকা স্বাস্থ্যমন্ত্রীগৰাকীৰ্ এনে অসুস্থতাক লৈ চিকিৎসকসকল বিশেষভাৱে ব্যস্ত হৈ পৰে৷ কিন্তু তেওঁৰ এই অসুস্থতা গুৰুতৰ নোহোৱা বিষয়টোৱে সকলোকে আশ্বস্ত কৰিছে৷ আনহাতে মন্ত্রীগৰাকীৰ অসুস্থতাত উদ্বিগ্ণ হৈ পৰা বহু গুণমুগ্ধই গুৱাহাটীৰ বিভিন্ন মন্দিৰত চাকি জ্বলাই প্রার্থনা কৰে৷ আনকি ৰাজ্যৰ বিভিন্ন প্রান্ততো স্বাস্থ্যমন্ত্রীৰ আশু আৰোগ্যৰে মন্দিৰ–মছজিদ–গিৰ্জাত  প্রার্থনা জনায় বহুজনে৷

উল্লেখ্য যে মন্ত্রীগৰাকীয়ে টুইটযোগে নিজৰ অসুস্থতাৰ কথা অৱগত কৰাৰ লগতে দেওবাৰে দিনটো চিকিৎসকৰ পৰামর্শ অনুসৰি বিশ্রাম লোৱাৰ কথাও সদৰী কৰে৷ ইফালে, স্বাস্থ্যমন্ত্রীৰ অসুস্থতাৰ খবৰ পোৱাৰ পিছতেই টুইটাৰযোগে উদ্বিগ্ণতা প্রকাশ কৰিলে মুখ্যমন্ত্রী সর্বানন্দ সোণোৱালে৷ দেওবাৰে টুইটযোগে মুখ্যমন্ত্রীয়ে এইবুলি উল্লেখ কৰে– ‘হিমন্ত তুমি নিজৰ স্বাস্থ্যৰ প্রতি মনোযোগ নিদিয়াকৈ যথেষ্ট কষ্ট কৰা৷ তোমাৰ সু–স্বাস্থ্য ৰাজ্যৰ প্রতিজনৰ বাবে গুৰুত্বপূর্ণ৷ সোনকালে আৰোগ্য হোৱা৷ মোৰ শুভেচ্ছা সদায়ে তোমাৰ সৈতে আছে৷’  আনহাতে মন্ত্রী অতুল বৰা, চন্দ্রমোহন পাটোৱাৰী আৰু অৰুণাচলৰ মুখ্যমন্ত্রী পেমা খাণ্ডুৱেও টুইটযোগে ড০ শর্মাৰ আশু আৰোগ্য কামনা কৰে৷